Parlament Májilisiniń depýtaty Sergeı Sımonov Oral qalasyndaǵy «Kvant», «Stroıkombınat» jáne «Gıdroprıbor» JShS óndiristik kásiporyndarynyń jumysshy qyzmetkerlerimen kezdesip, «Nur Otan» partııasynyń saılaýaldy baǵdarlamasynda alǵa qoıylǵan máselelerdiń oryndalý barysy jóninde áńgimelep berdi.
Sonymen birge, ol búgingi kúni Parlament Májilisinde 83 zań jobasy boıynsha jumys júrgizilip jatqanyna, onyń 51-i biraýyzdan maquldanyp, Senatqa tapsyrylǵanyna, sonyń ishinde 34 zań jobasyna el Prezıdentiniń qol qoıǵanyna toqtalyp ótti. Budan soń Sergeı Anatolevıch Parlament Májilisinde naqty osy Batys Qazaqstanǵa qatysty qandaı sheshimder belgilengenine ekpin túsirdi.
Onyń aıtýynsha, bıylǵy jyly Aqjaıyq aımaǵyndaǵy 50 eldi meken aýyz sýmen qamtylmaq. Buǵan qosa, respýblıkalyq bıýdjetten 4 orta mektep salýǵa qajetti qarajat bólingen. Munyń ózi oblystaǵy mektepterdiń bárin bir aýysymdyq oqytý júıesine kóshirý maqsatynan týyndap otyr, dep atap kórsetti Májilis depýtaty.
Sergeı Sımonov saılaýshylardyń birqatar suraqtaryna jaýaptar qaıtara kelip, taǵy da oıǵa túsken máselelerdi jetkizgisi kelse, el azamattary úshin Parlament saıty qashanda ashyq ekenin aıtty. Iаǵnı, turǵyndar osy saıtty ashyp kirip, ózderin tolǵandyrǵan máseleler boıynsha kez kelgen Parlament depýtatynyń atyna saýal qoıa alady.
Temir QUSAIYN,
«Egemen Qazaqstan»
Batys Qazaqstan oblysy