1989-1997 jyldary Irannyń prezıdenti bolǵan Alı Hashemı Rafsandjanı 82 jasynda dúnıeden ótti, dep habarlady VVS. Osy eldiń buqaralyq aqparat quraldarynyń aıtýynsha, ol júrek talmasyna ushyraǵan. Rafsandjanı ózi prezıdent bolǵan ýaqytta Batyspen qarym-qatynasty nyǵaıtýǵa tyrysty.
Rafsandjanı ómiriniń sońǵy jyldary Saıası maqsattylyqty anyqtaý keńesiniń basshysy boldy. Bul uıym Irannyń birpalataly parlamenti - Májilis pen Konstıtýsııalyq sot qyzmetin atqaratyn parlament qaramaǵyndaǵy arnaıy organ - Konstıtýsııa saqshylary arasyndaǵy daýlardy sheshýmen aınalysady. Quramyna 12 múshe kiretin atalǵan Keńes 2013 jyly Rafsandjanıge prezıdent saılaýyna túsýge tyıym salǵan bolatyn. Al 2005, 2009 jyldary prezıdent saılaýynda jeńilgenimen, Rafsandjanı saıası tulǵa retinde bedelin saqtap qaldy.
Iran telearnalarynyń aıtýynsha, ol Irandaǵy azamattyq jáne saıası bostandyqty jaqtap, saıası tutqyndardy azat etýge bar kúshin jumsaǵan.
Rafsandjanı 1979 jyly Islam revolıýsııasynyń kóshbasshysy - Homeınıdiń jaqyn seriktesi bolǵan. Irakpen soǵys ýaqytynda eldiń áskerı qolbasshylarynyń qatarynda bolǵan ol Iran ekonomıkasy álsiregenin alǵa tartyp Homeınıdi Irakpen beıbit qarym-qatynas ornatýǵa kóndirgen.