Bıyl Qazaqstanda iske asyryla bastaıtyn «Nurly jer» turǵyn úı baǵdarlamasy aıasynda aldaǵy 15 jylda 1,5 mıllıon otbasyn baspanamen qamtamasyz etiletin bolady.
Bul týraly Elbasy Nursultan Nazarbaev halyqqa arnaǵan jyl saıynǵy Joldaýynda aıtty.
Prezıdenttiń aıtýynsha, ýrbanızasııa úderisi qurylys sektoryn damytý qajettigin alǵa tartyp otyr. Ol otandyq ekonomıkanyń tolyqqandy draıverine aınalýǵa tıis.
«Jol, turǵyn úı jáne basqa da ınfraqurylym qurylysyna ınvestısııa sala otyryp, biz qalalarymyzdyń uzaq jyldarǵa deıin syrtqy jáne tehnologııalyq kelbetin aıqyndaıtynymyzdy umytpaǵanymyz jón. Sondyqtan qurylysqa da, qurylys materıaldaryn óndirý salasyna da jańa tehnologııalardy engizý kerek. Ol úshin bizde qazir jaqsy múmkindikter bar.
Meniń tapsyrmam boıynsha bıyl «Nurly jer» turǵyn úı baǵdarlamasy iske asyryla bastaıdy. Ol asa mańyzdy mindetti oryndaýǵa – aldaǵy 15 jylda 1,5 mıllıon otbasyn turǵyn úımen qamtamasyz etýge baǵyttalǵan.
Baǵdarlamada turǵyn úı naryǵyn damytýdyń keshendi sharalary kórinis tapqan. Sonyń biri – «Damý» aksıonerlik qoǵamy arqyly memlekettiń sýbsıdııa berýi esebinen qurylys salýshylar úshin bank nesıesin arzandatý. Turǵyndar úshin «Qazaqstan ıpotekalyq kompanııasy» aksıonerlik qoǵamy arqyly bankter beretin ıpotekalyq nesıeni sýbsıdııalaý júzege asyrylady.
«Turǵyn úı qurylys jınaq banki» salymshylary úshin ákimdikterdiń nesıelik turǵyn úı salýy jalǵasady. Oǵan ilgeride bólingen qarjy «revolver» qaǵıdaty boıynsha qaıta paıdalanylady», – dedi ol.
Memleket basshysynyń aıtýynsha, ákimdikter halyqtyń áleýmettik álsiz toptaryna satyp alý quqyǵynsyz arendalyq turǵyn úıdi bólý isin damyta beretin bolady. Jappaı turǵyn úı qurylysy úshin ákimder tıisti jer telimderin bólýge tıis.
«Biz qalalarda jeke turǵyn úılerdiń biryńǵaı sáýlet stılinde salynýyna mán beretin bolamyz. Bul úshin memleket qajetti ınfraqurylym turǵysynan kómek kórsetedi. Úkimet ákimdermen birlesip, úlken qalalardyń irgeles ornalasqan eldi mekendermen kólik baılanysyn damytý jóninde sharalar qabyldaýy qajet», – dep túıdi N.Nazarbaev.