Nursultan Nazarbaevtyń 2011 jylǵy 3 sáýirde ótken prezıdenttik saılaýdaǵy aıqyn da senimdi jeńisine jáne kezekti merzimge Qazaqstan Respýblıkasynyń Prezıdenti qyzmetine resmı túrde kirisýine baılanysty Elbasynyń atyna shet memleketter basshylarynan, halyqaralyq uıymdardyń jetekshilerinen, qazaqstandyq jáne sheteldik memleket jáne qoǵam qaıratkerlerinen, kásiporyndar, mekemeler jáne uıymdar ujymdarynan, Qazaqstannyń, TMD elderiniń jáne ózge memleketterdiń azamattarynan kóptegen hattar men jedelhattar kelip tústi.
Joldanǵan quttyqtaýlarda saılaýdyń nátıjesi – Nursultan Nazarbaevtyń Memleket basshysy qyzmetindegi eńbegine berilgen joǵary baǵa, halyqtyń birliginiń, qoǵamnyń turaqtylyǵynyń jáne Qazaqstandy Ult Kóshbasshysy bastap kele jatqan baǵytqa degen adaldyqtyń kórsetkishi ekeni atap kórsetiledi.
Prezıdent Nursultan Nazarbaev óz atyna kelip túsken barlyq hattar men jedelhattar avtorlaryna jyly lebizdi quttyqtaýlary men jeke ózine jáne barsha Qazaqstan halqyna baǵyshtalǵan ıgi tilekteri úshin zor alǵys sezimin bildiredi.
Memleket basshysy óz kezeginde álemniń ár qıyrynan hat joldaýshylardyń barlyǵyna amandyq pen ıgilik, jaqsylyq jáne tabys tileıdi, dep habarlady Qazaqstan Respýblıkasy Prezıdentiniń baspasóz qyzmeti.