Kezdesý barysynda taraptar Qazaqstannyń aýyl sharýashylyǵy ónimderiniń Qytaı naryǵyna kirýi men shekteýlerdi joıý máseleleriniń birqataryn talqylady. Atap aıtqanda, Qytaı tarapy QHR-dyń jetkizýshi kompanııalar tizilimine engizý úshin bıyl sáýirde qoı eti óndirisiniń júıesin jáne et óńdeýshi kásiporyndardy tekseretinin rastady. Eki jaq ta Qazaqstannan Qytaıǵa eksporttalatyn 34 ónimge qatysty veterınarlyq jáne fıtosanıtarlyq talaptar Hattamalary jobalaryn kelisimdeý úderisin jyldamdatatyn boldy. Sondaı-aq, Qazaqstan tarapy el aýmaǵynda aýyl sharýashylyǵy ónimderiniń sapasy men qaýipsizdigin baqylaýǵa arnalǵan birikken zerthana qurý jáne ony tirkeý bastamasyn kóterdi.
Aıta keteıik, kezdesý qorytyndysy boıynsha kórshiles elge eksporttalatyn bıdaı kebegi partııalaryna qoıylatyn tekseris, karantın jáne sanıtarlyq talaptar týraly Hattamaǵa qol qoıyldy.
Atalǵan kelisimniń arqasynda qazaqstandyq bıznesmender tuńǵysh ret Qytaı naryǵyna bıdaı kebegin eksporttaý múmkindigine ıe bolady jáne de bul úrdisti alǵashqylardyń biri bolyp júzege asyrý múmkindigi «Huoerguosi Irbis International Trading Co LTD» kompanııasynyń úlesine tıip otyr.
О́z kezeginde, kompanııanyń bas dırektory Marat Dáýletqalıev osyndaı tıimdi sheshimderdiń astyq eksportyna serpin beretinin ataı otyryp, syndarly kelisim úshin kásipkerler atynan Qazaqstan Úkimetine alǵys bildirdi.