«Qazir Almaty oblysynda oqý-jattyǵý jıynyn ótkizip jatyrmyz. Daıyndyq 8 sáýirge deıin jalǵasady. Al 15 sáýirden bastap Astanada jalǵastyratyn bolamyz», – dedi Myrzaǵalı Aıtjanov sports.kz basylymyna bergen suhbatynda.
«Sońǵy ret Germanııada «kishi álem chempıonaty» sanalatyn «Chemistry Cup» týrnırinde boksshylarymyz úlken jetistikterge jetti. Degenmen, dál osy jarystan qatelikterimizdi de baıqadyq. Aldaǵy ýaqytta osy kemshilikterimizdiń ornyn toltyrýymyz kerek. Al aldaǵy aptadan bastap tehnıkalyq-taktıkalyq sheberlilikterin damytýmen aınalysamyz», – dedi ulttyq quramanyń bas bapkeri.
Osyǵan deıin 81 keli salmaqtaǵy Ádilbek Nııazymbetov pen Jánibek Álimhanuly jaraqattaryna baılanysty Azııa chempıonatyna qatysa almaıtynyn aıtqan edińiz. Olardyń ornyn kim baspaq?
«Ázirge bul jóninde naqty bir sheshim qabyldamadyq. Aldaǵy ýaqytta bapkerler quramymen osy máseleni talqylaıtyn bolamyz. 75 kelidegi jigitterimizdiń biri salmaǵyn kóterýi de múmkin. 81 kelide Bekzat Nurdáýletov pen Bek Nurmaǵanbet degen eki boksshymyz bar. Jastar arasyndaǵy álem chempıonatynda deńgeılerin baıqadyq. Olardy da nazarǵa alamyz», – dedi ol.
Qazir 75 kelide Tashkentte ótetin jarysqa Tursynbaı Qulahmet, Erik Áljanov, Ábilhan Amanqul úmitker atanyp otyr. Olar túrli halyqaralyq týrnırlerde júldeli oryndarǵa ıe boldy. Al bapkerler alqasy bul joly kimge tańdaý jasap otyr?
«Túrli nusqalardy qarastyryp otyrmyz. Mine, osy jigitterdiń birin 81 kelige kóterýimiz múmkin. Eki oqý-jattyǵý jıyny ótkennen keıin deńgeılerine baılanysty sheshim qabyldaımyz. Aıdyń sońynda Azııa chempıonatyna qatysatyn boksshylardyń tizimi jarııalanady», – dedi Aıtjanov.
Ulttyq quramanyń bas bapkeri Rıo Olımpıadasynyń kúmis júldegeri Vasılıı Levıt jaıly pikir bildirdi.
«Vasılıı 60-70%-ǵa daıyn. Aldaǵy jıyndardan keıin bárine daıyn bolady dep senemin. Árıne, óz basym Tashkentte ótetin jarysta Levıtten tek qana altyn júlde kútemin», – dedi.
Jeńil salmaqta ulttyq quramadaǵy karerasyn aıaqtaǵan Birjan Jaqypovtyń ornyn ulttyq quramada kim basýy múmkin?
«Qazir eki jas sportshynyń deńgeıin baqylap otyrmyz. «Astana Arlandary» sapynda júrgen Temirtas Júsipov te bar. Sonymen qatar, osy salmaqta el namysyn Erjan Jomart, Shalqar Aıqynbaı, Asqat Júsipov syndy bylǵary qolǵap sheberleri qorǵaýy múmkin», – dedi.
«Azııa chempıonatynda basty qarsylasymyz ózbek boksshylary bolatyny sózsiz. Degenmen, ózge eldiń boksshylaryn nazardan tys qaldyrýǵa bolmaıdy. Keı salmaqtarda Qyrǵyz jigitteri de myqty. Sonymen qatar, sońǵy jyldary Qytaı, Ońtústik Koreıa, Fılıppın, Taıland, Iran syndy memleketterde boks qarqyndy túrde damyp keledi», – dedi Myrzaǵalı Aıtjanov.
«Tashkentke úlken maqsat qoıyp baramyz. Biraq Rıo Olımpıadasynda ózbek boksshylaryna ketken esemizdi qaıtarý basty josparymyz. Qazaqstan quramasy Azııa chempıonatyna jańartylǵan qurammen barady. Olımpıadaǵa qatysqan eki boksshy ǵana barýy múmkin. Jankúıerlerimizdi qýantý úshin barymyzdy salamyz», – dedi Qazaqstan ulttyq quramasynyń bas bapkeri.