Odan soń Elbasy Ázerbaıjan Respýblıkasynyń burynǵy prezıdenti Geıdar Álıevtiń rýhyna taǵzym jasaý úshin ázerbaıjan kósemi jerlengen zıratqa taban tiredi. N.Nazarbaevty bul jerde qurmetti qaraýyl kútip alyp, memorıalǵa bastap júrdi.
Qazaqstan Respýblıkasynyń Prezıdentin Ázerbaıjan Respýblıkasynyń Prezıdenti Ilham Álıev óziniń jumys rezıdensııasy «Zagýlba» saraıynyń aldynda mártebeli meımanǵa laıyqty barsha rásimderdi jasap, sán-saltanatpen qarsy aldy. Qurmet qaraýyly eki eldiń memlekettik ánurandaryn oryndady.
Resmı kezdesýden keıin memleket basshylary shaǵyn quramda kelissóz júrgizdi. Kezdesý barysynda saıası, saýda-ekonomıkalyq jáne mádenı-gýmanıtarlyq yntymaqtastyqtyń damý ahýaly men perspektıvalary, sondaı-aq, kún tártibindegi halyqaralyq jáne óńirlik ózekti máseleler talqylandy.
– Birinshi kezekte, elińizge sapar jasaýǵa shaqyrǵanyńyz úshin alǵys bildiremin. Biz ázerbaıjandyq baýyrlarymyzdyń tarapynan jylylyq, qonaqjaılyq peıildi sezdik, – dedi Elbasy.
Nursultan Nazarbaev Qazaqstan men Ázerbaıjan arasynda ejelden tarıhı jáne mádenı baılanystarǵa negizdelgen dástúrli dostyq sıpatyndaǵy ekijaqty qarym-qatynas qalyptasqanyn atap ótti. Memleket basshysy álemdik ekonomıkadaǵy qazirgi kezdegi jańa úrdister eki el seriktestigin odan ári damytýǵa tyń serpin bere alatynyn aıtty.
– Álemdegi daǵdarystyq qubylystar ulttyq ekonomıkamyzǵa aıtarlyqtaı zalalyn tıgizip jatqanyn kórip otyrmyz. Sonymen qatar, bul birlesken jańa óndirister ashyp, múmkindikterimizdi paıdalanýǵa jol ashýda. Ekonomıkany ártaraptandyryp, ınnovasııalyq tehnologııalarǵa nazar aýdarý qajet, – dedi Qazaqstan Prezıdenti.
Sonymen qatar, Prezıdent ekijaqty yntymaqtastyqtyń barlyq salasynda ózara is-qımyldy údetý, sonyń ishinde Qazaqstan men Ázerbaıjannyń kólik-tranzıt áleýetin damytý qajettigin atap ótti.
– Bul kezdesý elderimizdiń ózara is-qımylyn odan ári tyǵyz damytýǵa múmkindik týǵyzatyn jańa formattaǵy qarym-qatynasymyzǵa tyń serpin berýge tıis, – dedi Memleket basshysy.
Qazaqstan Prezıdenti eki memlekettiń halyqaralyq saladaǵy ózara túsinistigine jáne ustanymdarynyń uqsastyǵyna da nazar aýdardy. Budan bólek, Nursultan Nazarbaev I.Álıevti 2016 jylǵy el konstıtýsııasyna ózgerister engizý qarastyrylǵan referendýmda Ázerbaıjan halqynyń, prezıdenttiń ókilettik merzimin uzartýǵa baǵyttalǵan ózgeristerdi qoldaǵanymen quttyqtady.
О́z kezeginde, Ázerbaıjan basshysy N.Nazarbaevtyń sapary eki eldiń arasyn jaqyndatý asa mańyzdy ekenin aıtty.
– Sizdiń saparyńyz bizdiń elderimizdiń arasyndaǵy dostyq, baýyrlastyq baılanystardy odan ári nyǵaıtýda asa zor mańyzǵa ıe. Birinshi kezekte, Qazaqstan Respýblıkasynyń BUU Qaýipsizdik Keńesiniń músheligine saılanýymen taǵy da quttyqtaǵym keledi. Bul – Qazaqstannyń halyqaralyq qatynastardaǵy róliniń, beıbitshilikti nyǵaıtýǵa baǵyttalǵan mańyzdy bastamalar usynyp júrgen jeke Sizdiń bedelińizdiń moıyndalýy. Ekijaqty qatynastardyń damý barysyna biz rızamyz, únemi tyǵyz baılanystamyz. Búgin de pikir almastyq. Pikir almasý nátıjesinde biz talqylanǵan taqyryptardyń barlyǵynda ustanymdarymyz sáıkes keletindigine kóz jetkizdik. Belsendi saıası is-qımyldar, ekonomıka, kólik salasyndaǵy múmkindikterdiń barlyǵyn egjeı-tegjeıli talqyladyq. Meni eki eldiń kompanııalary arasynda ınvestısııa salý jumystarynyń jolǵa qoıylǵany qýantady. Sizdiń kelýińiz jáne búgin qabyldanatyn sheshimder ınvestısııa kólemin ulǵaıtý úshin jeke sektordyń yntasyn arttyrady dep oılaımyn. Sizdiń saparyńyz óte tabysty bolyp, bizdiń elderimizdi odan ári jaqyndastyra túsetinine senim bildiremin, – dedi Ilham Álıev.
Odan keıingi kezekte eki memleket prezıdentteri, úkimet músheleri jáne ulttyq kompanııalar basshylary keńeıtilgen quramda kelissóz ótkizdi. Osy kelissózderdiń qorytyndysy boıynsha, Qazaqstan men Ázerbaıjan prezıdentteri, sonymen qatar, eki memlekettiń úkimet músheleri, ulttyq kompanııalarynyń basshylary birqatar mańyzdy qujattarǵa qol qoıdy. Atap aıtar bolsaq, Qazaqstan Respýblıkasynyń Prezıdenti Nursultan Nazarbaev pen Ázerbaıjan Respýblıkasynyń Prezıdenti Ilham Álıev Birlesken deklarasııaǵa qol qoıdy.
«Qazaqstan temir joly» Ulttyq kompanııasy» AQ prezıdenti Qanat Alpysbaev pen «Ázerbaıjan temir joldary» JAQ prezıdenti Djavıd Gýrbanov Logıstıka jáne temir jol kóligi mashınasyn jasaý salasyndaǵy strategııalyq yntymaqtastyq týraly kelisimge qol qoıdy.
Qazaqstan men Ázerbaıjannyń syrtqy saıasat vedomstvolarynyń basshylary Qaırat Ábdirahmanov pen Elmar Mamedıarov 2017-2018 jyldarǵa arnalǵan yntymaqtastyq baǵdarlamasyn bekitti.
Qazaqstannyń Ázerbaıjan Respýblıkasyndaǵy Tótenshe jáne ókiletti elshisi Beıbit Isabaev pen Ázerbaıjan Respýblıkasynyń Qazaqstandaǵy Tótenshe jáne ókiletti elshisi Rashad Mamadov 1996 jylǵy 16 qyrkúıektegi Qazaqstan Respýblıkasy Úkimeti men Ázerbaıjan Respýblıkasy Úkimeti arasyndaǵy tabys pen múlikke qosarlanǵan salyq salýdy boldyrmaý jáne salyq tóleýden jaltarýǵa jol bermeý týraly konvensııaǵa ózgerister men tolyqtyrýlar engizý týraly Qazaqstan Úkimeti men Ázerbaıjan Úkimeti arasyndaǵy hattamaǵa qol qoıdy.
Qazaqstannyń Investısııalar jáne damý mınıstri Jeńis Qasymbek jáne Ázerbaıjannyń Ekonomıka jáne ónerkásip mınıstri Shahın Mustafaev Qazaqstan Respýblıkasy Úkimeti men Ázerbaıjan Respýblıkasynyń Úkimeti arasyndaǵy halyqaralyq avtomobıl qatynasy týraly kelisimge qol qoıdy.
Qazaqstan Premer-Mınıstriniń birinshi orynbasary Asqar Mamın men Ázerbaıjan Aýyl sharýashylyǵy mınıstri Geıdar Asadov eki el úkimetteri arasyndaǵy О́simdikter karantıni jáne olardy qorǵaý salasyndaǵy yntymaqtastyq týraly kelisimge qol qoıdy.
Qol qoıý rásiminen keıin N.Nazarbaev pen I.Álıev birlesken málimdeme jasady. Elbasy I.Álıevke resmı saparǵa shaqyrǵany úshin alǵysyn bildire otyryp, eki memleket arasynda qanat jaıýǵa tıisti máseleler týraly baıandady.
– Biz taýar almasýdy arttyrýǵa aıryqsha mán berdik. Mıllıon dollarlyq kólem bizdiń áleýetimizge jaýap bere almaıdy. Sol sebepti, osy oraıda Kaspıı teńizi arqyly logıstıkalyq yntymaqtastyq basty orynǵa shyǵady. Qazaqstan Qytaı Halyq Respýblıkasynyń «Bir beldeý – bir jol» jobasyndaǵy Jańa Jibek jolyna tartylǵan. QHR shekarasynan Kaspıı teńizine deıin jalpy uzyndyǵy 1 myń shaqyrymdy quraıtyn temir jol salynǵan. Bul jol qazirdiń ózinde jemisin berýde. Uzyndyǵy 2 700 shaqyrymdyq «Batys Qytaı – Batys Eýropa» avtokólik joly da júrgizilýde. Sol sebepti, qazir másele Qytaıdan konteınerler tasý týraly bolyp tur. Ony Eýropaǵa Kavkaz, Baký, Kaspıı teńizi arqyly jetkizý kerek. Osy jerde zor áleýet bar,– dedi Elbasy.
Memleket basshysy atap ótkendeı, bul baǵyttaǵy tasymal kólemi 6-7 mıllıard dollardy quramaq. Onyń basym bóligi Baký arqyly ótse, Ázerbaıjan 500-600 mıllıon dollar tabys taba alady.
Elbasynyń paıymdaýynsha, Qazaqstan men Ázerbaıjan arasyndaǵy taýar aınalymynyń kólemin aldaǵy ýaqytta mıllıardtyq deńgeıge deıin jetkizýge bolady.
– Indýstrııalandyrý saıasatynyń arqasynda biz zamanaýı elektrovoz, teplovoz, temir joldardyń betki qurylystaryn óndirýdi jolǵa qoıdyq. Munyń barlyǵy Ázerbaıjanǵa kerek, biz ony jetkize alamyz. Al Ázerbaıjannan Aqtaýǵa jetkizilgen kókónis taýarynyń ózi búkil Qazaqstanǵa taralady, ol bir jyldyń ishinde 12 esege artqan. Bul bizdiń elderimizdiń arasyndaǵy saýda-sattyq baılanystardyń asa zor áleýetiniń kórsetkishi, – dedi Elbasy.
Memleket basshysy ekijaqty ekonomıkalyq baılanystyń basqa da baǵyttary týraly baıandady. Ázerbaıjan Prezıdentiniń qonaqjaı peıiline, dostyq kóńiline rızalyǵyn bildirip, EKSPO-2017 halyqaralyq kórmesine qurmetti meıman retinde qatysýǵa, sonymen qatar Shanhaı yntymaqtastyq uıymyna tóraǵalyq jasaýshy memleket retinde qonaq bolýǵa shaqyrdy.
О́z kezeginde, I.Álıev N.Nazarbaevqa degen jyly lebizin, qazaq eline degen qurmet sezimin bildirdi.
– Bıyl biz eki memleket arasynda dıplomatııalyq qatynastar ornaǵanyna 25 jyl tolýyn atap ótemiz. Jalpy, bizdiń halyqtardyń ózara baılanystar tarıhy júzdegen jyldarmen esepteledi. Qazaqstan-Ázerbaıjan qatynastarynyń tarıhy dostyqqa, áriptestikke, bir-birin qoldaýǵa qurylǵan. Biz halyqaralyq qurylymdarda da belsendi áriptestik baılanystamyz, únemi bir-birimizdi qoldap kelemiz. Baýyrlas Qazaqstannyń BUU Qaýipsizdik Keńesine músheligine qýanyshtymyz. Qazaqstannyń halyqaralyq jáne jahandyq isterdegi mańyzdy róli men bedelin moıyndaı otyryp, BUU Qaýipsizdik Keńesine músheligi beıbitshilik pen qaýipsizdikti nyǵaıtýǵa baǵyttalatynyna senim bildiremiz. Sondaı-aq, halyqaralyq qurylymdarda Ázerbaıjanǵa qoldaý kórsetip kele jatqany úshin alǵys bildirgim keledi, – dedi I.Álıev.
Kaspııdiń qaptalyndaǵy kórshiler
Bıyl, naqtyraq aıtqanda, aldaǵy tamyz aıynda Qazaqstan men Ázerbaıjan arasynda dıplomatııalyq qatynastardyń ornaǵanyna 25 jyl tolady. Shırek ǵasyr ishindegi qarym-qatynastyń shejiresin sholyp shyǵar bolsaq, Bakýdegi Qazaqstan elshiligi 1993 jyly ashylypty.
Qazaqstan-Ázerbaıjan dostyǵynyń nyǵaıýyna áser etken sapar 1994 jyly jasaldy. Ázerbaıjan Respýblıkasynyń sol kezdegi prezıdenti Geıdar Álıev naýryz aıynda Almatyǵa kelip, Qazaqstan Prezıdenti N.Nazarbaevpen kezdesti. Dostyq ráýishte ótken júzdesýde eki memlekettiń basshylary ózara yntymaqtastyqty damytýǵa áleýet mol ekenin sóz etti. Aýyl sharýashylyǵy, munaı-gaz mashınalaryn jasaý syndy basty salalardaǵy áriptestikti talqylady. Ázerbaıjanda sol kezde munaı-gaz mashınalaryn jasaýdyń myqty bazasy qalyptasqan bolatyn. Osyny eskerip, Qazaqstanda da bul sektordy birlesip damytýdyń joldary qarastyryldy. Bizdiń elimizden bıdaı, shıki munaı eksporttaý barysy talqylandy. Arada bir jyl ótkennen keıin Elbasy N.Nazarbaevtyń shaqyrýy boıynsha Qazaqstanǵa kezekti márte saparmen kelgen Geıdar Álıev Uly Abaıdyń týǵanyna 150 jyl tolýyna oraı IýNESKO kóleminde atap ótilgen alqaly jıynǵa qatysty.
Qazaqstan-Ázerbaıjan qatynastarynyń jańasha qarqyn alýyna Elbasy Nursultan Nazarbaevtyń 1996 jyly Bakýge resmı sapary tyń serpin berdi desek, artyq aıtpaımyz. Eki memleket basshylarynyń osy kezdesýinde kásiporyndar arasynda ekonomıkalyq baılanystardy kúsheıtý, mádenı saladaǵy qatynastardy damytý máseleleri talqylanyp, mańyzdy kelisimderge qol qoıylǵan-dy. Atap aıtar bolsaq, Baký qalasynda júrgizilgen kelissózder nátıjesinde Memleketaralyq qarym-qatynastar negizi týraly kelisimge, Kaspıı teńizine qatysty máseleler jónindegi birlesken deklarasııaǵa, Qosarlanǵan salyq salýdan bas tartý jónindegi memleketaralyq konvensııaǵa, Sport pen mádenıet salasyndaǵy yntymaqtastyqty damytý jónindegi kelisimge, Munaı men gaz ónerkásibi salasyndaǵy yntymaqtastyqty arttyrý jónindegi kelisimge, Áýe kóligi týraly kelisimge, Avtomobıl kóligi týraly hattamaǵa jáne basqa mańyzdy qujattarǵa qol qoıylǵanyn atap ótken jón.
Al 1997 jyly G.Álıevtiń Qazaqstanǵa sapary aıasynda eki el prezıdentteri negizinen munaı-gaz sektoryna, kólik-kommýnıkasııa salasyna baılanysty saýda-ekonomıkalyq qatynastardy damytý týraly deklarasııa qabyldady. Qazaqstandyq munaıdy halyqaralyq naryqqa shyǵarýǵa jol ashatyn memorandýmǵa qol qoıylǵanyn osy kezdesýdiń basty jemisteriniń biri deýge bolady.
1998 jylǵy 10 mamyrda Qazaqstannyń elordasy Arqa tósine kóshken aıtýly oqıǵaǵa oraı elimizge at basyn burǵan memleketter basshylarynyń arasynda Geıdar Álıev te boldy. Osylaısha, Kaspıı teńiziniń mártebesin aıqyndaý, sonymen qatar ekijaqty saıası qatynastarmen baılanysty basqa da máseleler Astana tórinde talqylanǵanyn aıta ketý kerek.
Jalpy, Qazaqstan-Ázerbaıjan arasynda jan-jaqty baılanystyń nyǵaıyp, yntymaqtastyqtyń artýyna negizinen eki memlekettiń basshylary tikeleı ról oınaıdy. Memleketter basshylarynyń jıi kezdesip, júıeli túrde qarym-qatynas ornatýynyń arqasynda Qazaqstan men Ázerbaıjan arasynda shynaıy dostyqqa, baýyrlastyqqa negizdelgen saıası, ekonomıkalyq, mádenı baılanystar tereńdeı tústi.
Jahandyq saıası, ekonomıkalyq ahýaldyń sońǵy jyldary kúrdelene túskenine qaramastan, Qazaqstan-Ázerbaıjan qatynastarynyń jyl sanap yrǵaqty damı túskenin baıqaýǵa bolady. Qazaqstan Prezıdenti janyndaǵy strategııalyq zertteýler ınstıtýtynyń derekterine kóz júgirtsek, osyǵan aıqyn kóz jetkizemiz. 2016 jyly ózara saýda aınalymynyń kólemi 136,8 mıllıon AQSh dollaryn qurap, aldyńǵy jyldaǵy kórsetkishten 9 paıyzǵa asyp túskeni osynyń bir mysaly.
Qazaqstan Ázerbaıjanǵa negizinen temir jol jáne lokomotıv jabdyqtaryn, qara metall, janar-jaǵarmaı, qurylys materıaldaryn eksporttaıdy. Al ımporttyń negizgi bóligin qant jáne kondıterlik ónimder, qara metaldan jasalǵan tehnıka túrleri, kókónis, toqyma ónimderi, elektr qural-jabdyqtary quraıdy. Ekonomıka salasyndaǵy qatynastardyń nyǵaıýyna Qazaqstan-Ázerbaıjan úkimetaralyq komıssııasynyń jumysy da tıimdi múmkindik týǵyzyp keledi.
Tarıhy tereń tamyrlastyq
Jalpy, Qazaqstan men Ázerbaıjan arasyndaǵy qatynastar tek ekonomıkalyq sektormen shektelip qalǵan emes. Eki eldiń baýyrlastyq pen dostyqqa negizdelgen baılanystarynyń tarıhy tereńinen bastaý alatyny belgili. Týystas halyqtardyń mádenıeti, rýhanııaty bir qaınar kózden bastaý alatyny áldeqashan dáleldengen.
Bul oraıda, elimizdegi ázerbaıjan dıasporasy da ekijaqty baılanysqa uıytqy bolyp turǵanyna toqtala ketken jón. О́tken ǵasyrdyń alǵashqy jartysynda taǵdyr daýyly Grýzııa, Armenııa elderindegi ázerbaıjandardy qazaq topyraǵyna aıdap ákelgen. Odan soń, 1950-80 jyldar aralyǵynda tyń ıgerýge, munaı kenishterinde jumys isteýge kelgen ázerbaıjandardyń taǵy bir tolqyny ýaqyt óte kele osynda ornyǵyp qaldy. Táýelsizdiktiń alǵashqy jyldarynda tarıhı otandaryna qaıtyp ketkenderdiń qarasy birtalaı bolǵanymen, Qazaqstanda qalýdy qalaǵandardyń da urpaǵy búginde júz myńǵa jýyqtaıdy eken. Iаǵnı, sany jaǵynan alǵanda elimizdegi ázerbaıjan dıasporasynyń úlesi onynshy orynda.
Elimizdegi ózge ulystar sııaqty, ázerbaıjan dıasporasynyń da basqalarmen terezesi teń ómir súrýine, bilim alýyna, eńbek etýine tolyqqandy jaǵdaı jasalǵan.
Búginde shtab-páteri Bakýde ornalasqan eki eldiń Parlamenttik assambleıasy tabysty jumys isteýde. Halyqaralyq Túrki akademııasy, TÚRKSOI, Túrik keńesi janyndaǵy Aqsaqaldar keńesi syndy halyqaralyq uıymdar eki eldiń rýhanı-mádenı baılanystaryn tereńdetýge súbeli úles qosýda.
Geografııalyq ornalasýy jaǵynan arasyn teńiz ǵana bólip turǵan eki memlekettiń mádenı, rýhanı baılanystary ótken ǵasyrda óte jaqsy damydy deýge bolady. Eki eldiń qalamgerleri, rýhanı qaıratkerleri ózara shyǵarmashylyq dostyq ornatyp, tájirıbe almasyp, qatynastaryn úzgen emes. Ázerbaıjanda qazaq qalamgerleriniń, qoǵam qaıratkerleriniń mereıtoılaryn atap ótý de dástúrge aınalǵan. Máselen, sonaý 1954 jyly Bakýde Uly Abaıdyń shyǵarmashylyǵy týraly halyqaralyq konferensııa ótipti. Abaıdyń «Eskendir», «Masǵut», «Ázimniń áńgimesi» syndy shyǵarmalary, basqa da óleńderi ázerbaıjan tiline tárjimalanyp, kitap bolyp shyqqan. Abaı shyǵarmashylyǵyn kólemdi zertteý eńbekteri jarııalanǵan.
Osy oraıda, Uly Abaı shyǵarmashylyǵyna yqpal etken Shyǵys ádebıeti alyptarynyń biri, ázerbaıjannyń ataqty aqyny Nızamı Gánjaýı týraly da aıtyp ótken jón. Abaı men Shákárim shyǵarmashylyǵyna yqpal etken ázerbaıjan ádebıetiniń eki alybynyń biri osy Nızamı bolsa, ekinshisi Fızýlı dep bilgen abzal. Abaı Nızamı dastanynyń negizinde «Eskendir» poemasyn jazsa, Shákárim Fızýlıdiń «Láıli-Májnúnin» qazaq tiline tárjimalaǵany belgili. Qazaq handyǵynyń 550 jyldyǵy qarsańynda da ázerbaıjan aǵaıyndar baýyrlas el retinde syı-qurmetterin kórsetip, «Qyz Jibek» lıro-epostyq jyryn ázerbaıjan tiline aýdarǵany esimizde.
Baılanys búgin de berik
Baýyrlas el bıyl Astanada ótetin EKSPO-2017 halyqaralyq kórmesine atsalysýǵa nıetti ekenin de aıtpaı kete almaımyz.
Kaspıı teńiziniń aınalasyndaǵy ózge úsh el sııaqty, Qazaqstan men Ázerbaıjan da munaı, gaz syndy dástúrli energııalyq resýrstardy tutynyp qana qoımaı, eksporttaý, tasymaldaý baǵytynda da alǵa basqan el ekeni málim. Alaıda, «jasyl» energııaǵa kóshý zaman talaby ekenin túsingen elder bul baǵytta da kóshten qalmaýdyń qamyna kirisip ketken. Astana «Bolashaqtyń energııasyn» damytýǵa kúsh salsa, Ázerbaıjan tarapy «О́tkennen bolashaqqa beriletin qýat» degen uranmen halyqaralyq kórmege qatysady.
Ázerbaıjanǵa 2005 jyly resmı saparmen barǵan Elbasy N.Nazarbaev osy eldiń burynǵy prezıdenti Geıdar Álıev qoryna at basyn buryp, qor jumysymen tanysyp, estelik dápterge óz júreginen shyqqan lebizderin jazyp qaldyrǵan-dy. Onda Elbasy «Geıdar Álıevtiń esimi árqashan halyq júreginde. Ol – bar ǵumyryn halqynyń órkendep-ósýine, eliniń qaıta jańǵyrýyna sarp etti, sol sebepti de esimi máńgi jasaı beredi», dep jazǵan bolatyn. Osy jolǵy saparynda da Memleket basshysy ázerbaıjannyń ulttyq kósemi men onyń jubaıy jerlengen zıratqa at basyn tiregenin Ázerbaıjan Prezıdenti men el halqy ystyq yqylaspen qabyl alǵany baıqaldy.
Táýelsizdiktiń shırek ǵasyrynda ózara tyǵyz áriptestik qatynastar ornatqan Qazaqsten men Ázerbaıjan búginde aımaqtyq lıderlerdiń dárejesine kóterilip, Eýropa men Azııa arasynda «altyn kópir» bola alǵany aqıqat. Elbasy N.Nazarbaevtyń Kaspııdiń kelesi betindegi baýyrlas elge resmı sapary osy kópirdiń odan saıyn bekýine, Qazaqstan-Ázerbaıjan arasyndaǵy baılanystyń odan ári baıandy bolýyna yqpal etkeni anyq.
Arnur Asqar,
«Egemen Qazaqstan» –
Bakýden (Ázerbaıjan)
Sýretter Prezıdenttiń baspasóz
qyzmetinen alyndy