Án, kúı, romans, ývertıýra, poema, kantata, opera, balet sııaqty túrli mýzykalyq janrlar aıasyn qamtyǵan 500-den astam tól týyndynyń avtory, qazaq mýzykalyq mádenıetine ólsheýsiz úles qosqan áıgili kúıshi-sazger, talantty dırıjer Nurǵısa Atabaıuly Tilendıevtiń mol murasyn óskeleń urpaq sanasyna sińirip, keńinen nasıhattaý maqsatynda jyl saıyn ótkizilip otyratyn atalmysh konferensııany N.Tilendıev atyndaǵy halyqaralyq qor uıymdastyrdy. Nuraǵańnyń ómirde janyna jaqyn tutqan jandary men ónerdegi dostary, izbasarlary bas qosqan aıtýly jıynnyń ótýine muryndyq bolǵan qor dırektory Oraljan Masatbaev Nurǵısa Tilendıev murasynyń zerttelmeı jatqan tustaryna toqtala otyryp, qazaq mýzykasynyń damýyn bútindeı bir ǵasyrǵa alǵa súıreı bilgen biregeı tulǵany ulyqtap otyrý – eliniń úlken paryzy ekenin atap ótti.
Belgili qoǵam qaıratkeri Kım Serikbaev, Qazaqstannyń eńbek sińirgen qaıratkeri, professor Pernebek Momynov, Qurmet ordeniniń ıegeri, ónertanýshy ǵalym Jarqyn Shákárim, «Otyrar sazy» orkestriniń dırıjeri, kompozıtordyń shákirti Jalǵasbek Begendikov, M.Áýezov atyndaǵy ádebıet jáne óner ınstıtýtynyń aǵa ǵylymı qyzmetkeri Zúlfııa Qasymova, Qarasaı aýdanyndaǵy Tuńǵysh Prezıdent mýzeıiniń jetekshisi, Qurmet ordeniniń ıegeri Rymkesh Baıqonysova, kúıshi Talap Qarash, Aqorda respýblıkalyq qozǵalysy tóraǵasynyń orynbasary Qanat Musaǵulov syndy tulǵalar qatysqan jıynnan Tilendıev tulǵasynyń daralyǵy tolyq ashylǵandaı. Al sazgerdiń jary, N.Tilendıev atyndaǵy halyqaralyq qor prezıdenti Darıǵa Tilendikelininiń kózine jas ala otyryp aıtqan estelikteri halqynyń Nur-aǵasyna degen saǵynyshyn, aıryqsha qurmet-yqylasyn arttyra túskendeı boldy.
Sazger-kúıshiniń shalqar teńizdeı shalqyǵan shyǵarmashylyǵyndaǵy keıbir shashylyp qalǵan, ıakı belgili-belgisiz sebeptermen joǵalyp ketken, jaryq kórmeı qalǵan jaýhar týyndylaryn jınaqtap, zerttep, kópshilik nazaryna usynýda kóp eńbek atqaryp júrgen nurǵısatanýshy qaýym kúıshiniń 90 jyldyǵy atalyp ótken 2015 jyldan beri de basy qaıyrylǵan qyrýar sharýa jaıynda esep berisip, oı túıisti, pikir almasty.
Kesh barysynda áıgili sazger týraly «Habar» telearnasy túsirgen «Qustar qaıtyp barady» atty eki bólimnen turatyn fılmnen úzindi kórsetilip, «Otyrar sazy» orkestriniń oryndaýyndaǵy Nuraǵań kúıleri tyńdaldy. Bo-
ıyna tunǵan san qyrly talantymen, júregine syımaı búlkildegen áýen-sazymen bútin qazaq dalasyn terbeı bilgen daryn ıesi ómiriniń keıbir sátteri týraly Temirbek Júrgenov atyndaǵy óner akademııasy stýdentteri qoıǵan shaǵyn qoıylymdar jınalǵan qaýymdy bir sátke Tilendıev álemine jetelegendeı edi.
Mıra Baıbek,
«Egemen Qazaqstan»
ALMATY