Fılmniń negizi jelisi – ótken ǵasyrdyń ortasynda KSRO men AQSh arasynda paıda bolǵan qyrǵı-qabaq, dúrdarazdyq pen ǵarysh salasyn ıgerý barysyndaǵy asa kúshti saıası teketirestiń shynaıy ómirdegi kórinisin baıandaý. Osyny áıgili ǵaryshkerler Alekseı Leonov (Evgenıı Mıronov) pen Pavel Belıaevtiń (Konstantın Habenskıı) basynan ótken oqıǵalary arqyly óte bir sheberlikpen, óte bir úılesimdilikpen, kórermen kúrsine, tipti, kúńirene otyryp kóretindeı keremet tebirenispen jetkizgen.
Týyndyny kórip otyryp reseılik kınogerler psıhologııalyq drama jasaýdan álemdik deńgeıge kóterilgenin eriksiz moıyndaısyz ári qyzyǵasyz hám qyzǵanasyz. Aıtalyq, 60-jyldary KSRO men AQSh arasyndaǵy básekelestiktiń bir belesi «ǵarysh keńistigine kim buryn tiri adamdy shyǵarady» degenge baryp tireledi. Bul naqty shyndyq. Keńes Odaǵynyń basshylary bul isti 1967 jylǵa josparlap qoıǵan. Biraq «ońbaǵan» AQSh bulardyń aldyn orap ketkeli jatqany áshkere boldy. Osydan keıin, KSRO kósemderi raketa jáne ǵaryshtyq óndiris salasynyń bas konstrýktory Sergeı Korolevqa «ǵarysh keńistigine tiri adam shyǵarý eki jylǵa jedeldetilip, 1965 jyly júzege asyrylsyn» degen tapsyrma-buıryq júkteıdi.
Kıno joǵarydaǵy pármendi buıryqty júzege asyrýdyń qanshalyqty qıyn bolǵanyn, qanshalyqty qymbatqa túskenin, tapsyrma oryndaý kezindegi adamdardyń jankeshtiligi, ómir men ólim úshin tilmen aıtyp jetkize almaıtyn aıqastar, tyǵyryqqa tirelý, kenet jaqsylyqqa bastaıtyn úmitti joldyń oıanýy... bári-bári bar.
Al, fılmniń prodıýseri Tımýr Bekmambetovtiń aıtýynsha, kıno túsirý ıdeıasyn kótergen ártis Mıronov. Sóıtip, Evgenıı ekeýi KSRO-nyń eki dúrkin batyry, ańyz ǵaryshker Leonovpen kezdesedi. Alekseı Arhıpovıch olarǵa alty saǵat boıy 50 jyl buryn bolǵan oqıǵany búge-shigesine deıin áńgimeleıdi.
– Osy kezdesýden keıin biz mynadaı ǵajap adam týraly jáne ǵaryshty ıgerýdiń álemdik tarıhyndaǵy adam senbes oqıǵalar jaıly fılm túsirýdi qolǵa aldyq, – deıdi Tımýr Bekmambetov.
Dýblıajǵa barlyǵy 25 akter qatysqan. E.Mıronovqa dýblıaj jasaǵan ártis Azamat Qanapııa bolsa, K.Habenskııdi – Ǵanı Quljanov, S.Korolevti Baqytjan Nurpeıisov dybystaǵan. Ǵaryshta, ne tireýi, ne turaǵy joq keńistikte shyrkóbelek aınalyp júrgen keme ishinde, ólim men ómir arpalysyndaǵy Leonov pen Belıaevtyń jankeshti dıalogtaryn buzbaı-syzbaı qazaq tilinde dál kınodaǵydaı tebirenispen jetkizý... aıtarǵa sóz joq ǵajap.
Rasynda, dýblıaj ártisteri keıipkerler emosııasyn tolyq bere alǵan. Sondyqtan da, bul týyndyny eń áýeli qazaq dýblıaj ónerindegi úlken jetistik dep baǵalasaq, qatelespeımiz.
Beken QAIRATULY,
«Egemen Qazaqstan»