Alqaly jıynda syrtqy ister mınıstrleri Qazaqsan Prezıdenti N.Nazarbaevtyń 2015 jyly Býrabaıda ótken TMD Sammıti kezinde usynǵan uıymdy zamanaýı ahýalǵa beıimdeý týraly bastamasyn damytýǵa qatysty birqatar ýaǵdalastyqqa qol jetkizdi. Atap aıtar bolsaq, TMD Ekonomıkalyq sotyn reformalaý máselesi maquldandy. Endigi ýaqytta bul organ ońtaılandyrylǵan formattaǵy «ad hoc» prınsıpi boıynsha jumys isteıdi. Iаǵnı, bul prınsıp boıynsha sýdıalar turaqty emes negizde jumysqa kóshedi, apparat sany aıtarlyqtaı qysqarady, nátıjesinde oǵan jumsalatyn bıýdjet shyǵyndary da únemdeledi degen sóz.
Delegasııalar basshylary quqyq qorǵaý qyzmeti salasyndaǵy birqatar qujattardy maquldady. Mınıstrler maquldaǵan quqyqtyq, uıymdastyrý jáne aqparattyq-taldaý máselelerin júzege asyrý jónindegi sharalar kesheni TMD-ǵa múshe elderdiń ózara qarym-qatynasyn kúsheıte túsýge baǵyttalǵan.
Qalyptasqan dástúr boıynsha keńes barysynda mádenı-gýmanıtarlyq máselelerge kóńil aýdaryldy. «Dostastyqtyń mádenı astanalary» baǵdarlamasynyń jobasyn taraptar biraýyzdan qoldaǵanyn aıta ketý kerek. Mundaı mártebeni 2018 jyly Armenııadaǵy Gorıs qalasy, 2019 jyly Belarýstiń Brest qalasy ıelenetini belgili. Qazaqstan tarapy 2020 jyly Dostastyqtyń mádenı astanasy mártebesin Shymkent shaharyna berýdi usyndy. Osy oraıda, Astana qalasy – 2012 jyly, Almaty 2014 jyly Dostastyqtyń mádenı astanasy atanǵanyn aıta keteıik.
Shaǵyn formatta ótken kezdesýler aıasynda syrtqy saıasat vedomstvolarynyń basshylary aımaqtyq jáne jahandyq kún tártibinde turǵan ózekti máselelerdi talqylady. Qaırat Ábdirahmanov áriptesterine elimizdiń BUU Qaýipsizdik Keńesine múshe retindegi alǵashqy 100 kún ishinde atqarǵan jumys barysy týraly, Elbasy N.Nazarbaevtyń osy dúnıejúzilik uıymnyń joǵary organdarynyń múshelerine arnaǵan málimdemesinde kórsetilgen basymdyqtar týraly baıandap berdi.
Otyrys qorytyndysy boıynsha TMD Syrtqy ister mınıstrleriniń keńesi hrıstıan, musylman jáne basqa da konfessııalar ókilderine qatysty kemsitýshilikke jáne tózimsizdikke jol bermeý týraly málimdeme qabyldady. Bul qujatta elordada ótetin Álemdik jáne dástúrli dinder kóshbasshylary sezderiniń erekshe mańyzǵa ıe ekendigi kórsetilgen.
Qaırat Ábdirahmanovtyń shara barysynda qyrǵyzstandyq áriptesi Erlan Abdyldaevpen kelissóz júrgizgenin aıta keteıik. Bul kezdesý 1997 jyldyń sáýir aıynda Almatyda qol qoıylǵan Qazaqstan men Qyrǵyzstannyń Máńgilik dostyǵy týraly sharttyń 20 jyldyǵymen tuspa-tus ótti. Eki tarap atalǵan qujatta kórinis tapqan qundylyqtardy negizge alyp, ózara qarym-qatynasty odan ári nyǵaıta túsýge múddeli ekendikterin jetkizdi.
Q.Ábdirahmanov Tájikstannyń Syrtqy ister mınıstri Sırodjıddın Aslovpen de kezdesý ótkizdi.
Osy kúni Qazaqstan syrtqy saıasat vedomstvosynyń basshysy Ortalyq Azııa memleketteri syrtqy ister mınıstrleriniń kezekti kezdesýine de qatysyp, aımaqtaǵy yntymaqtastyqty damytýdyń basym baǵyttary, halyqaralyq jáne aımaqtyq uıymdar aıasynda ózara áriptestikti nyǵaıtý máseleleri tóńireginde pikir almasty.
«Egemen-aqparat»