Qazaqstanda psıhologııalyq kómek kórsetý tártibin buzǵany úshin aıyppul salý qarastyrylýy múmkin. Mundaı túzetýler búgin Májiliste «Psıhologııalyq qyzmet týraly» zań jobasy aıasynda talqylanyp jatyr, dep habarlaıdy Egemen.kz.
Májilis depýtaty Irına Smırnovanyń aıtýynsha, zań jobasyna sáıkes psıhologııalyq qyzmetpen tek memlekettik reestrge engizilgen mamandar ǵana aınalysa alady.
Sonymen qatar, ol memlekettik tizimge kirmegen psıhologtyń qyzmet kórsetý jaǵdaılary týyndaýy múmkin ekenin atap ótti. Depýtattar mundaı jaǵdaıda, eger kórsetilgen psıhologııalyq kómek adamnyń densaýlyǵyna zııan keltirse, qandaı jaýapkershilik qarastyrylatynyn surady. Májilis depýtaty Aına Mýsralımova bul máselege qatysty qazirgi zańnamada tıisti jaýapkershilik qarastyrylǵanyn túsindirdi.
Psıhologtar memlekettik tizilimge tirkelýge mindetteledi
Onyń aıtýynsha, eger densaýlyqqa zııan keltirilgeni dáleldense, kináli adam Qylmystyq kodeks aıasynda jaýapqa tartylady. Zııannyń aýyrlyǵyna qaraı aıyppuldan bastap túzeý jumystaryna deıin túrli jazalar qoldanylady, al aýyr jaǵdaılarda bas bostandyǵynan aıyrý jazasy da qarastyrylýy múmkin.
Zań jobasyn talqylaý barysynda depýtattar psıhologııalyq kómek kórsetý salasyndaǵy talaptardy buzǵany úshin bólek ákimshilik jaýapkershilik engizý qajettigin de aıtty.
«Qazirgi ýaqytta biz psıhologııalyq kómek kórsetý tártibin buzǵany úshin aıyppul sanksııalaryn qarastyratyn túzetýlerdi talqylap jatyrmyz. Aıyppuldardyń mólsheri ázirge naqtylanǵan joq, olardy ekinshi oqylymǵa deıin pysyqtaımyz», dedi A. Mýsralımova.
Aıta keteıik, bul zań jobasy 2025 jyldyń aqpan aıynan beri talqylanyp keledi. Qujat Qazaqstanda psıhologııalyq kómek salasyn retteıtin jeke zań qabyldaýdy kózdeıdi.
Qazaqstanda psıhologtardyń qyzmeti zańmen retteledi