Sahna sańlaǵynyń samǵaýy

Qazaq sahna ónerindegi ózgeshe bir shoǵyr – otyzynshy jyl­dardyń tólderi qatarynan sýy­ry­lyp shyqqan talanttar toby. Jaryq juldyzdar shoǵyrynda Ánýar Moldabekov, Farıda Shá­ripova, Sábıt Orazbaev, Asanáli Áshimov, taǵy basqalar bartuǵyn. Raıymbek Seıtmetov «sahna» degen sózdi «saqana» deıtin. «Saq ana», «saqtyń anasy», «saq jur­ty­­nyń, saq eliniń anasy» degendeı estiletin. Solaı seziletin. Sol saq anaǵa adal akter­leri­mizdiń biregeıi Sábıt Orazbaev­tyń 75 jasqa tolǵan toıy Oń­tústik óńirinde dúrkirep ótti. Saq anadaıyn kóretin sheshesi Apaqaı ana aıtqan eken: «Balam, alańdama maǵan. Aýylda qalyp qoısań, ókinesiń. О́zgeshesiń sen. О́nerińdi óltirme. Qalaǵan maman­dy­ǵyńdy al. Oqy. Maqsatyńa jet», dep. Al aýyldaǵy aqyl­shylar: «Ártis bolma, adam bol. Mal dárigerligin meńger», degen. Sábıt Orazbaevtyń maıtalman maman, jaýapkershiligi asa joǵary mal dárigeri bolýǵa mol múmkindigi bar-tuǵyn. Biraq ol júreginiń únine qulaq qoıdy. Úlken árippen jazylatyn ma­ǵy­nadaǵy Ártis te, Adam da bolyp shyq­ty. Sahna sańlaǵynyń sam­ǵaýy aıtýly Arys ózeniniń bo­ıynan bastalǵan. Mamyr aıynyń ortasynda Ońtústik jurtshylyǵy Qazaq­stan­nyń halyq ártisi, Memlekettik syılyqtyń laýreaty Sábıt Orazbaevtyń 75 jyldyǵyn úsh kún toılady. Alǵashqy kúni akterdi oblys ákimi Asqar Myr­zahmetov bir top zııaly qaýym ókilderimen birge qabyldady. Emin-erkin áńgime boldy. Syı-sııapat jasaldy, oqaly shapan jabyldy, oıýly bórik kıgizildi. «Siz – qazaq halqynyń maqtany­shy­syz, mereıisiz. Táýelsizdikke qyzmet ete berińiz,  uzaq jasańyz, aǵa», dedi ákim. «Aınalaıyn, hal­qymnan. Jambyl jákemiz aıt­qandaı, jas quraqtaı jaınaı be­rińder. Kúngeıdiń kóktemi keremet, aýasy káýsar bop tur eken. Eńbeksúıgish ólkeniń beıneti jansyn. Tunyp turǵan tarıhtyń baǵasyn bilińder. Abylaı han jan tapsyrǵan, asyl súıegi jat­qan topyraqtyń kıesin qadir­leń­der. Qazyǵurt, Qarataý, Alataý túıisip turǵan, tamyljyǵan týǵan jerim, keń-baıtaq Qazaqstanym kórkeıe bergeı», dedi Sábeń. Ekinshi kúni Jumat Shanın atyn­daǵy oblystyq drama teatryn­da keremet kesh ótti. О́ńir­degi segiz teatr arnaıy ázir­lik jasapty. Ázil-kúlkige, taǵylymdy tamashaǵa qu­rylǵan quttyqtaýlar asa qyzǵy­lyqty da mazmundy boldy. Asan­áli Áshimovtiń «ssenarııge» baǵynbas is-áreketi de tebirenisti hám áserli shyqty. Ekeýiniń qu­shaqtasyp uzaq turǵan «paýzasy» da jurtty tolqytyp jiberdi. Má­jilis depýtattary Qýanysh Aıtahanov, Saýyrbaı Esjanov, Nur­lan О́nerbaı syndy azamat­tar­dyń aqedil tilekteri tógildi. «Ártister álemi, jalpy akterler týraly qansha kitap jazsam da, bulardy jete túsinemin deı almas edim, – dedi teatr synynyń sardary Áshirbek Syǵaı. – Sábıt Orazbaev – sýretker akter. Bir qaraǵan­da, tomaǵa-tuıyq, kóp ashyl­maı­tyn adam syqyldy. Al ishki álemi, ıntellektisi ǵajap. Akterligine ánshiligi, oıshyldyǵy úıle­sim ústep, odan beter bıiktetip ákete barady. Elbasymen de, etikshimen de sóılese biledi. Us­qyn­syz tirlikterge usaqtal­ma­ǵan tul­ǵa. Mine, búgin de bárimiz jańa­ryp, jańǵyryp, jasaryp otyr­myz. О́ner adamy úshin eldiń alaqanynan artyq marapat joq». Úshinshi kúni Sábeń toıy Saıram aýdanynda, Aqsý men Arys­tyń boıynda jalǵasty. Aýdan bas­shysy Ýálıhan Qaınazarov jańa­dan ashylǵan dendrobaqta, dúıim jurttyń aldynda akterge aqbozat mingizdi. Qurmanbek Jan­dar­bekov­tiń, mereıtoı ıesi Sábıt Oraz­baevtyń, ózge de óner órenderiniń kindik qany tamǵan qaıran Saı­ramnyń tamyljyǵan topyraǵyna nurly shýaq quıy­lyp turdy. Oqta-tekte jańbyr sir­kiredi. Án áýelep, kúı kúmbirledi. Jyrlar oqyldy. Marhabat BAIǴUT.