«Nurjol» jasyl býlvarynda ótetin III halyqaralyq «AstanaArtFest-2017» art-festıvali naǵyz óner kórmesi deýge laıyq. Munyń elorda turǵyndary men qonaqtarynyń eń súıikti sharalarynyń biri bolatynyna senimdimin. Bul baıqaýǵa eki jylda álemniń 10 memleketinen 78 myń sýretshi qatyssa, ony tamashalaǵan kórermenniń sany jarty mıllıonnan asyp ketti», dedi basqarma basshysy. Onyń sózinshe, festıvalǵa dúnıe júzinen kelgen qylqalam sheberlerimen qatar, dızaınerler, arhıtektorlar, mýzykanttar men rejısserler qatysady. Daıyn týyndylar 1 maýsymnan bastap ornatyla bastaıdy, al festıvaldyń ashylýy 10 maýsymǵa belgilengen.
Jalpy EKSPO-2017 kórmesi barysynda 647 mádenı shara ótedi eken. «Mádenı-kópshilik sharalar qalada jaz boıy uıymdastyrylady. Josparlanǵan dúnıeler túrli formatta ótpek. Onda konsertter, kórmeler, otbasylyq sharalar, teatrlandyrylǵan jáne sırk qoıylymdary bolady. Al kórmeniń ashylý jáne jabylý saltanattary «Báıterek» monýmenti mańynda, qalalyq alańda jáne Stýdenttik saıabaqta ornatylatyn úlken LED-dıspleıler arqyly tikeleı efırde translıasııalanady», dedi B.Majaǵulov.
Elordada ótetin, jarty álem kóz tikken úsh aılyq jıyn aıasynda Qazaqstanda alǵash ret KVN jazǵy kýbogy ótedi. Úlken Aleksandr Maslıakovtyń qatysýymen baq synasatyn jaıdarmanshylar qatarynan sońǵy jyldardaǵy joǵary lıga chempıondaryn da kóremiz. Olar – «Azııa Mıks», «Kamyzıak», «Pıatıgorsk» komandalary. Sondaı-aq, sahnaǵa «Kazahı» KVN qurama komandasy da shyqpaq. Bolat Majaǵulovtyń aıtýynsha, 1 shildede ótetin KVN jazǵy kýbogy 300 mln kórermeni bar «Pervyı kanal» efırinde translıasııalanady. Shara bıletiniń quny ázirge kelisilmegenimen, osy aptanyń sońyna deıin naqtylanyp, tıisti aqparat jarııalanatyn bolady.
Baspasóz máslıhaty barysynda basqarma basshysy 15 shilde kúni Italııanyń mýzykasyn súıip tyńdaıtyn tyńdarmandar úshin «San-Remo juldyzdary – Astanada» atty festıval ótetindigin málimdedi. Sonymen qatar, maýsym aıynyń úshinshi jartysynda «Báıterek» monýmenti aldynda qazirgi zamanǵy etnostyq mýzykanyń «TheSpiritofAstana» atty festıvali uıymdastyrylmaq. Oǵan Afrıka, AQSh, Makedonııa, Grýzııa, Vengrııa, Reseı, Qazaqstan, Bashqurtstan, Býrıatııa jáne Týva elderinen mýzykalyq toptar shaqyrylǵan. «Astana kúnin toılaý qazaqstandyq estrada juldyzdarynyń konsertimen bastaý alady. Elordalyq konsert zaldarynda «MýzART», «Dervıshı» toptarynyń jáne Seken Turysbek pen Altynbek Qorazbaevtyń jeke keshteri uıymdastyrylady», dedi B.Majaǵulov.
Jazdyń úsh aıynda qala saıabaqtarynda «Saıabaqtyń jeti keremeti» atty shara ótedi. Qazaq ertegileriniń, tanymal mýltfılmder keıipkerleriniń, dısneılik robottardyń qatysýymen 7 taqyryptyq baǵdarlama kópshilik nazaryna usynylady. Jalpy alǵanda, saıabaqtarda balalar men eresekterge arnalǵan myńnan asa oıyn-saýyq sharasy uıymdastyrylady. Demalys kúnderi qala mańyndaǵy turǵyn alaptarda qazaqstandyq ártister men elordalyq shyǵarmashylyq ujymdary «Dýmandy Saryarqa» konsertin qoıady. Sonymen qatar, jazda «Astana juldyzy» ulttyq kásibı mýzykalyq syılyǵyn tabystaý saltanaty ótedi. Sharaǵa otandyq estradanyń tanymal ókilderi qatysady jáne «Úzdik jyl oryndaýshysy» anyqtalady.
Uıymdastyrýshylar tarapynan bilgenimizdeı, barlyq konsertke bıletter qala kassalarynda jáne www.koncertyastany.kz saıtynda satylady. Al EKSPO-2017 halyqaralyq kórmesi barysynda ótetin sharalar týraly tolyq aqparat kestemen birge www.astanaday.kz saıtynda jarııalanady.
Ashat RAIQUL,
«Egemen Qazaqstan»