«Jeńis» jobasy 2015 jyldan júrgiziledi. Jobanyń operatory «Samruk-Kazyna Trust» áleýmettik jobalaryn damytý qory. Eriktiler jasaqtary kelesi qalalarda jumys isteıdi: Astana, Almaty, Aqtaý, Atyraý, Aqtóbe, Jańaózen, Qaraǵandy, Kókshetaý, Qostanaı, Qyzylorda, Pavlodar, Petropavl, Rýdnyı, Semeı, Taraz, Taldyqorǵan, Tekeli, Temirtaý, Oral, О́skemen, Shymkent, Ekibastuz. 2016 jyldyń qorytyndysy boıynsha joba sheńberinde Qazaqstanda turatyn 2911 ardagerge, soma mólsheri 291,1 mln teńgeni quraıtyn kómek kórsetildi. Eriktiler jasaqtary jyl saıyn UOS ardagerleriniń sharýashylyǵyna járdem beredi, olarǵa dári-dármek, azyq-túlik, sondaı-aq birinshi qajettilik boıynsha qoldaý kórsetedi. 2017 jyldan bastap UOS ardagerleri ǵana emes, olarǵa teńestirilgen tyl eńbekkerlerine de kómek kórsetiletin bolady. Jobanyń «Jeńisti júregińde saqta!» uranyna sáıkes, eriktiler reıdteri búkil el boıynsha, tipti ústimizdegi jyldyń jeltoqsan aıynyń aıaǵyna deıin jalǵasady. 2016 jyly «Jeńis» jobasy aıasynda «Qazposhta» AQ tarapynan, sondaı-aq «Dalalyq poshta» aksııasy iske qosylyp, onyń sheńberinde árbir «meıirimdi jan» ardagerge hat jazyp, arnaıy qorapshalar arqyly jibergen edi. Aksııa ústimizdegi jyly da jalǵasatyn bolady. Budan basqa, joba aıasynda «Jolaýshylar tasymaly» AQ 1-31 mamyr aralyǵynda UOS ardagerlerine arnalǵan kýpe vagondarynda olardyń tegin jol júrýlerin qamtamasyz etedi.
«Egemen-aqparat»