Biz osyndaǵy ardagerler keńesiniń tóraǵasy Suraǵan Kópeevti áńgimege tartyp, aǵa býyn ókilderine kórsetilip jatqan qamqorlyqtar jaıly aıtyp berýin ótingen edik.
– Búginde keńeske 1786 ardager múshe, olardyń 7-eýi fashıstik Germanııaǵa qarsy asqan qaharmandyqpen shaıqassa, 28-i tylda janqııarlyqpen eńbek etken. Qaı-qaısysynyń ómir joly alyp qarasańyz, erlikke toly, jastar úshin úlgi-ónege. Qoǵamdyq tártiptiń qaýipsizdigin qamtamasyz etýge qosqan zor úlesteri ártúrli dárejedegi memlekettik nagradalarmen atap ótilgen. Jaqynda Djýra Kobelev degen maıdangerimiz júz jasqa tolyp, OIID-niń basshysy, general-maıor Berik Bilálovtiń tarapynan úlken qurmet kórsetildi. Ivan Kýzın, Grıgorıı Krasılnıkov, Shaıahmet Myrzahmetov jergilikti áskerı gospıtalda em-domdaryn alyp, densaýlyqtaryn ońaltyp qaıtty. Sońǵy eki jylda 125 ardager Almatydaǵy «Qazaqstan» sanatorııinde tynyǵý múmkindigine ıe boldy. Endi, mine, ishki ister organynyń 160 ardagerine IID-niń basshylyǵy atynan halyqaralyq kórmege tegin joldamanyń berilýi taǵylymdy dástúrdiń ómirsheń jalǵastyǵy bolsa kerek, – dedi S.Kópeev.
Qylmyspen kúreste, aldyn alýda, boldyrmaýda basyn qaterge tigip, únemi alǵy shepte júrgen aǵa býyn ókilderi Otan degen asyl uǵymdy kózdiń qarashyǵyndaı qadirleı biledi. Sol sebepti qandaı qurmet kórsetilse de esh artyqtyq etpeıdi. Aleksandr Saharov, Bazarbaı Omarov, Mıhaıl Bednyh, Olga Kýzenkova sekildi qoǵamdyq jumystarǵa belsene atsalysyp júrgen ardagerlerimiz Astanaǵa baryp, halyqaralyq kórmeni armansyz tamashalaıtyn bolady.
Olardyń erlik isteri men nebir qıyndyqty bastan ótkergen ómir joldary arqyly óskeleń urpaqty qazaqstandyq patrıotızmge baýlý, eldi, jerdi súıýge tárbıeleý basty muratymyz bolyp qala beredi. Bul turǵydan sóz qozǵaıtyn bolsaq, atqarylyp jatqan jumystar qyrýar. OIID ǵımaraty janyna 752 jaýyngerdiń esimi jazylǵan memorıaldyq eskertkish qoıylǵan. Osydan shırek ǵasyr buryn qyzmet baby kezinde áldebir qaskúnemderdiń qolynan qapııada qaza tapqan Ǵazız Esimov atyndaǵy alleıa jumys isteıdi. Jumysqa ornalasqan jas qyzmetkerler osynda kelip, gúl shoqtaryn qoıady, taǵzym etedi. Sol sııaqty Qyzyljar aýdanynyń Berezovka eldi mekenine osy aýyldyń týmasy, Keńes Odaǵynyń Batyry Fılıpp Chıjıkovtyń músini ornatyldy. Vedomostvony talaı jyl basqarǵan general-maıor Mıhaıl Baranovtyń qurmetine memorıaldyq taqta qoıyldy.
О́mir ESQALI,
«Egemen Qazaqstan»
Soltústik Qazaqstan oblysy