«2007 jyldan Baqyt Tursynuly tikeleı óziniń bastamasymen «Syn» ádebı-syn jýrnalynyń negizin qalap, osy basylymǵa basshylyq etip keledi. Qalamgerdiń «Qyzyl alma» ádebı-syn maqalalarynyń jınaǵy, «El men Elbasy» atty kitaptary shyqty. «Aqıqat aldynda», «О́tkirdiń júzi», «Jıyrma bes», «Bes múshel», «Shandoz sózdiń shahy» sekildi ádebı-syn eńbekteri oqyrman qaýym tarapynan joǵary dárejede baǵalandy. Osy oraıda bir toqtalatyn jaıt, Qyzylorda oblysy ákimdiginiń qoldaýymen shyqqan kóptomdyq «Syrdarııa kitaphanasy» serııasymen qalamgerdiń «Kókkesene» ádebı-syn kitaby jaryqqa shyqty. Baqyt Tursynulynyń ádebıet álemindegi ólsheýsiz eńbegin qasıetti Qarataý men kıeli Syr topyraǵynyń jurtshylyǵy árqashan maqtan tutady», degen aımaq basshysy mereıtoı ıesine Qyzylorda oblysynyń qurmet gramotasyn tabys etip, ıyǵyna shapan japty.
Sondaı-aq, mereıtoı ıesin fılologııa ǵylymdarynyń doktory, professor Qulbek Ergóbek quttyqtady. О́z kezeginde B.Sarbalaev ystyq yqylasyn bildirgen jerlesterine rızashylyǵyn jetkizdi.
Ádebıet synshysy Qyzylordada eki kún bolady. Á.Tájibaev atyndaǵy oblystyq ámbebap kitaphanada «Talmas talant ıesi» atty shyǵarmashylyq keshi ótti, al 16 mamyrda qalamgerdiń Qorqyt ata atyndaǵy Qyzylorda memlekettik ýnıversıtetiniń jáne «Bolashaq» ýnıversıtetiniń stýdentterimen kezdesýi josparlanǵan.