Kádesyıdan qur qalmańyz!
Bıyl elordamyzdyń enshisine tıgen EKSPO kórmesiniń bıletteri satylymǵa túskeninen habardarmyz. Talaıymyz kassalardan alyp, mıllıondar qatysatyn sharany kún sanap taǵatsyzdana tosyp júrgenimiz de ras. Al sonyń ishinde quny 20 myń teńge turatyn bılettiń ereksheligi ne ekenin bilesiz be? Ol kıizden jasalǵan. Buıyrsa, bas shahardyń tórine qadam basqan qonaqtar kıizden jasalǵan bıletke qol jetkize alady. Ony kádesyı retinde de saqtaýǵa bolady.
Arnaıy tapsyryspen baspadan shyqqan bıletterdiń sany shekteýli. «Astana EKSPO-2017» ulttyq kompanııasy Kommersııalandyrý departamentiniń dırektory Dáýlet Erkimbaev olardyń bar-joǵy 10 myń dana ekenin aıtady. Eń bastysy, kıizden jasalǵan bıletter kórmeniń kez kelgen kúnine jaramdy ári ony tirketýdiń qajeti joq.
«Kıizden jasalǵan bıletter sheteldikterge mindetti túrde unaıdy. Olardyń kóbi qazaqtyń ulttyq buıymdaryna qyzyǵady. Bul rette kıizden jasalǵan bıletter bizdiń tabıǵatymyzǵa da jaqyn. Bılet ári kádesyı túrindegi buıym bolǵandyqtan, kóptiń kóńilinen shyǵatyny sózsiz», deıdi teri buıymdarynyń sheberi elordalyq Darhan Kebekbaev.
«Kosmostyń» júldesi qomaqty
EKSPO-2017 kórmesiniń taǵy bir qyzyǵy – úzdik ınnovasııalyq joba úshin quny 20 myń eýro bolatyn «Kosmos» syılyǵy beriledi. Osymen besinshi ret taǵaıyndalǵan júldeniń ázirge kimge buıyratyny belgisiz?
«Astana EKSPO-2017» UK» AQ Halyqaralyq qatysýshylarmen jumys jónindegi departament dırektory Ilıa Orazaqovtyń aıtýynsha, bul – EKSPO-90 halyqaralyq qory men Halyqaralyq kórmeler bıýrosynyń áleýmettik jobasy. Mólsheri, joǵaryda aıtqanymyzdaı, qomaqty. Ol jobany damytýǵa arnalǵan startap túrinde tabystalady, ıaǵnı halyqaralyq kórme aıasynda áleýmettik salada úzdik dep tanylǵan ınnovasııalyq jobaǵa beriledi.
Atalmysh syılyq týraly qujatqa «Astana EKSPO-2017» ulttyq kompanııasynyń basshysy Ahmetjan Esimov, Halyqaralyq kórmeler bıýrosynyń bas hatshysy Vısente Lossertales jáne «EKSPO-90» qorynyń basshysy Norıakı Otsýkı qol qoıǵan bolatyn. Búginde Halyqaralyq kórmeler bıýrosy múshelerinen arnaıy qazylar alqasy qurylyp, baıqaýdyń taqyryby jarııalandy. Údeden shyqqan úzdik joba Astanada ótetin kórmeniń jabylý saltanaty kezinde anyqtalatyn bolady.
Ulttyq mýzeıdegi úsh keremet
EKSPO-2017 halyqaralyq mamandandyrylǵan kórmesiniń erekshe syılyqtarynyń biri – terrakot áskeri, ejelgi Mysyr eskertkishteri jáne Ermıtajdaǵy eksponattar. Qonaqtar bul qundylyqtardy Astanadan alystamaı-aq kóre alady. Alǵashqysyn Ulttyq mýzeıden tamashalaısyz. Aty ańyzǵa aınalǵan ımperator Sın Shıhýandıdiń terrakot áskeri mýzeıiniń kórmesi 9 maýsymnan 10 qyrkúıekke deıin jalǵasady. IýNESKO-nyń mádenı muralar tizimine engen Sın dınastııasy jaýyngerleriniń músinderi – naǵyz óner týyndysy. Onda elýge jýyq arheologııalyq buıym qoıylady. Atap aıtsaq, áskerlerdiń músinderi, qarý-jaraqtar, ydys-aıaqtar, altyn jáne kúmis áshekeıler.
Kelesisimen de atalǵan nysanda qaýysha alasyz. Mysyrdyń mádenıetimen, tarıhymen etene tanysýǵa múmkindik alǵan kelýshiler patshanyń altyn jalatylǵan aǵash kúımesin, otyrǵan taǵyn, sarkofagyn, asyl tastarmen órnektelgen perǵaýynnyń altyn jaǵasyn jáne qyz músinin kóredi. Grek-rım kezeńi rımdik áıel beınesiniń músini arqyly áspetteledi. Ásem jazýlarmen bezendirilgen shyraǵdan jáne gúlmen kómkerilgen farfor tabaq jádigerleri Islam kezeńin qamtıdy. Bul 23 maýsymnan bastap elordalyqtar men qonaqtardyń nazaryna usynylady.
Al úsh mıllıonǵa jýyq jádigeri bar álemdegi eń úlken murajaı Ermıtajdan kelgen qarý-jaraq kórmesi 3 shildeden 10 qyrkúıekke deıin jalǵasady. Ulttyq mýzeıde bolatyn «Ermıtaj kúnderinde» Shyǵys pen Batystyń jetpiske jýyq qarý-jaraq úlgisi qoıylady. Onyń ishinde Túrkııa, Iran, Úndistan, Japonııa, Fransııa, Italııa, Germanııa, Ispanııa elderinde áskerde, ańshylyqta, merekede paıdalanylǵan qarýlar bar.