«Damý» qory «Asyldar» jobasyn bastady

Osylaısha Qordyń «Asyldar» atty jobasy shaǵyn jáne orta bıznestiń aqsap turǵan nemese kósh bastap kele jatqan tustaryn anyqtap, kompanııanyń damýyn tejep turǵan máselelerdi anyqtaýdy kózdeıdi.  Jańa jobaǵa qatysýshylardyń dıagnostıkalyq qorytyndysy boıynsha Jol kartasy men is-áreket jospary jasalyp, saraptamalyq konsaltıng, trenıngtik qoldaý, sheteldik mıssııa men qarjylyq kómek alý úshin usynym-pikir daıyndalady.  «Asyldar» – qanatqaqty joba. Biz osy saladaǵy shet eldik tájirıbelerdi eskere kelip, «Koreı respýblıkasy Shaǵyn jáne orta bıznesti damytý korporasııasynyń» ozyq tájirıbesine súıenýdi jón dep taptyq. Eldiń ishki jalpy óniminiń súbeli bóligin shaǵyn jáne orta kásipkerlik quraıtyny belgili. Biz bul salanyń básekege qabiletti ári qarqyndy damyǵanyn qalaımyz. Osy maqsatta kásiporynnyń barlyq «keselin» anyqtap, jospar jasap, semınarlar men trenıngter ótkizip, sheteldiń aldyńǵy qatarly kásiporyndarymen tájirıbe almasýǵa múmkindik beretin joba daıyndaldy. Munyń barlyǵy óndiristiń tıimdi jumys isteýine, qyzmettiń ózindik qunyn tómendeýine, sapasy men ózi-ózi aqtaý qasıetin arttyrýǵa alyp keledi», – dedi «Damý» qorynyń basqarýshy dırektor-basqarma múshesi Ǵabıt Lesbekov.  Shaǵyn jáne orta bıznes dıagnostıkasyna kompanııanyń dál qazirgi jaǵdaıy, ónerkásiptik/tehnologııalyq taldaý, kompanııanyń óndiristik qýaty, Jol kartasy, is-áreket jospary men sarapshylardyń usynym-pikiri kiredi.  Sol sııaqty jobaǵa ilikkenderge saraptamalyq konsaltıng usynylady. Bul – óndiristiń zamanaýı úlgisin, bıznes júrgizýdiń ozyq ádisterin, marketıng, jańa quralmen jumys isteıtin qyzmetkerlerdiń biliktiligin arttyrýdy engizetin joǵary bilikti sarapshylar qyzmeti.  Ári jobaǵa qatysýshylarǵa salalyq taqyrypty qamtıtyn jeke trenıng pen semınar ótkizý de qarastyrylǵan.  Al kompanııaǵa dıagnostıka jasaý, saraptamalyq konsaltıng pen semınarlar aqysyn tóleýdiń 90 paıyzyn «Damý» qory mindetine alyp otyr. Qalǵan 10 paıyzyn jobaǵa qatysýshy tóleıdi. Oǵan qosa saraptamalyq konsaltıngtiń usynym-pikirlerin óndiriske engizgen iskerler tájirıbeden ótý úshin sheteldik kásiporyndardy tańdaý da «Damý» qorynyń jaýapkershiliginde.  Qazirge jobaǵa qatysýshylarǵa tómendegideı talaptar qoıylyp otyr. Úmitkerler Astana, Almaty qalalary men Almaty oblysy, Shyǵys Qazaqstan, Qaraǵandy oblystarynan shyqqan óńdeý salasynyń ókilderi bolýy kerek. Oǵan qosa menshik túri – QR azamatyna tolyq nemese jartylaı tıesili, kem degende sońǵy úsh jyl jumys istep turǵan kásiporyn bolýy kerek. Jáne kásiporyn basshysy nemese orynbasary kemi sońǵy 5 jylda kásipkerlik salada basshylyq etýi tıis.  Aınash Esalı,  «Egemen Qazaqstan».  ALMATY