Eńbekti súıgen adam qıyndyqtan qashpaıdy. Soltústik Qazaqstan oblysy Jambyl aýdanyndaǵy Amangeldi aýylynyń jurtynda jalǵyz úı bolyp qalyp, kóshken eldiń 150 jylqysyn baǵyp otyrǵan Ádilhan Baıtasov esimdi jigitti búgingi kúnniń naǵyz eńbeksúıgish eri desek jańylyspaımyz.
Bul aýyl – jazýshy Safýan Shaımerdenovteı birtýar tulǵanyń kindik qany tamǵan áıgili meken. Amal bar ma, búgingi ómir talabymen turǵyndary tegis kóship ketip, tek osy Ádilhan ǵana qaldy. Ol jastaıynan mal baqqan, atakásipti jan-dúnıesimen súıetin azamat.
«Aýyldan ketkim kelmeıdi. Árıne, qalaǵa kóshsem bir kisideı kúnimdi kórer edim, biraq janym árdaıym dalany ańsap turady», deıdi ol.
Aýyldan kóshkende satpaǵan, ótpegen jylqylaryn turǵyndardyń bári Ádilhanǵa senip tapsyryp ketken. Jasy jer ortasyna jaqyndap qalǵan jan bolsa da shıraq, on jyldan beri kóshken aýyldastarynyń qosqan jylqysyn óz malyndaı aıalap, baǵyp-kútip keledi. Tipti jaralanǵandary, merttikkenderi bolsa ustap alyp, emdep jiberedi. Aldymen aýylda jalǵyz úı bolyp turǵan, biraq artynan kóshpegen kórshi aýyldan úı alyp, sonda qonys aýdardy. О́zi joqta jylqyny keń albarǵa qamap ketedi. Tańerteń shyǵaryp, keshke deıin baǵady.
Jylqynyń birde-bireýi tusalmaǵan, osynyń ózinen jylqyshynyń sheberligin baıqaýǵa bolady. Jıyn-terim aıaqtalǵan soń jylqyny tipti erkin jiberedi. Kúzge salym ıeleri kelip, soǵymǵa soıatyndaryn ustaıdy. Júgen-quryq tımegen shý asaýlardy ustaý da ońaı emes, ondaıǵa da Ádilhan ǵana epti.
Bilmegen adamǵa 150 jylqyny sanaý da qıyn. Tuıaqty mal bir orynda turmaı jyljı beredi. Tájirıbeli jylqyshy kózben ǵana sanaıdy eken. Adam sııaqty, jylqynyń arasynda da belgilileri bolady. Ádilhan olardyń qatarynda júretin birnesheýin juptap qarap shyqsa boldy, jylqynyń sanyn biledi. Baıaǵyda, osy tóńirekte úıir-úıir jylqy ustaǵan Áltı baı malyn kólge jiberip, sýǵa quryq salyp sanap alady deýshi edi. Jylqy ishken soń sý quryqtyń belgilep qoıǵan jerine deıin tómendese, maly túgel, al belgilengen jerge barmaı, bıikteý qalsa jylqy bólinip ketipti dep baıbalam salady eken. Sol sııaqty, Ádilhannyń Dýlat degen aǵasynan úırengen óz ádisi bar kórinedi.
Eńbegine qaraı jylqyshynyń tabysy da jaman emes, ár tuıaqqa bes myń teńgeden alǵanda aıyna 700 myńdaı tabady. Bul jyl on eki aı boıy qystyń sýyǵy men jazdyń aptabyna qalyp júrgen janǵa kóp emes, árıne. Saqyldaǵan sary aıazda Ádilhannyń jylqysy tebinde bolady. Birneshe kún boran soǵyp, aıaz qysqanda úıde jata almaımyn deıdi ol. Aıaz sál synyp, 15–20 gradýsqa tússe boldy, jylqylaryn izdep shyǵady. Qazir ıt-qus joq, jazdan semiz shyqqan jylqylar yqtaýmen aman qalady eken.
Bir qyzyǵy, Ádilhannyń jylqy baǵatyn kóligi – qytaılyq motosıkl. Ári yńǵaıly, ári jyldam kólik jylqyshyǵa naǵyz qol. Biraq qatty jaýyndarda jer ezilse júre almaıdy, ondaıda ertteýli aty daıyn turady. Eshqandaı másele, qıyndyq jóninde aıtpaı, kerisinshe bári jaqsy dep turǵan eńbekkerdiń isine sáttilik tilep attandyq.
Soltústik Qazaqstan oblysy