QR Parlamenti Májilisinde Úkimettiń 2016 jylǵa respýblıkalyq bıýdjettiń atqarylýy týraly esebin tanystyrý barysynda Qarjy mınıstri Baqyt Sultanov zeınetaqyny arttyrýǵa qansha qarjy bólingendigin málimdedi, dep habarlaıdy QazAqparat.
«Bekitilgen bıýdjettiń shyǵystary eki ret naqtylanýdyń nátıjesinde 980 mlrd teńgege kóbeıgen bolatyn. Bıýdjettiń osyndaı ulǵaıýy, birinshiden, áleýmettik salaǵa qarjyny kóbeıtýge múmkindik berdi. Shyǵystardyń jartysy, ıaǵnı 4 trln teńgesi áleýmettik bolyp tabylady», - dedi mınıstr.
Atap aıtqanda, 1 qańtardan bastap zeınetaqy mólsheri 9 paıyzǵa kóbeıdi.
«Zeınetaqyny tóleýge bıýdjetten 1 353 mlrd teńge qarjy bólindi. Azamattyq qyzmetkerlerdiń jańa eńbekaqy júıesi modelin engizýge 290 mlrd teńge bólindi. Bala týýǵa járdemaqy 438 myń alýshyǵa tólenip, oǵan 33 mlrd teńge jumsaldy», - dedi Sultanov.