Shymkenttiń bıýdjeti táýelsizdik jyldarynda 110 esege ósti. Bul týraly aımaqtyq kommýnıkasııalar qyzmetinde ótken brıfıng barysynda Shymkent qalasynyń ákimi Ǵabıdolla Ábdirahymov aıtty, dep habarlaıdy Ońtústik Qazaqstan oblysy ákimdiginiń baspasóz qyzmeti.
Brıfıng barysynda shahar basshysy qalanyń áleýmettik-ekonomıkalyq damý jaǵdaıy men Shymkenttiń Táýelsizdik jyldary qol jetkizgen jetistikteri týraly aıtqan. Qala basshysynyń málimetine súıensek, ekonomıka salasy boıynsha qala bıýdjeti 1994 jyly 1,0 mlrd teńgeni qurasa, búginde 110,0 mlrd teńgege artqan. Qala ekonomıkasyna salynǵan ınvestısııalar 459,0 mln teńgeden 200,0 mlrd teńgege ósken.
"Egemendigimizdiń alǵashqy jyldary Shymkentte 400 myń halyq bolsa, qazir olardyń sany 902 myńnan asty. Qala aýmaǵy 13 myń gektardan 117 myń gektarǵa ulǵaıdy. 25 jyl ishinde 3 965,0 myń sharshy metr jańa turǵyn úıler paıdalanýǵa berildi", – dedi qala ákimi. Sondaı-aq, ol sózinde búginde Shymkenttiń bıznes úshin óte qolaıly qalaǵa aınalǵandyǵyn atap ótti. Qala aımaǵynda 75 myńǵa jýyq kásipkerlik sýbektileri tirkelip, osy salada 136 myń adam jumyspen qamtylǵan.