Rıo Olımpıadasynyń chempıony Danııar Eleýsinov barsha qazaqstandyqtardy Táýelsizdik meıramymen quttyqtady, dep habarlaıdy QazAqparat.
Boksshy sondaı-aq, elimizdiń ánuranyn árqashan shyrqatyp júrýge ýáde berdi.
«Elimizdiń mereıli merekesi – Táýelsizdiktiń 25 jyldyǵy qutty bolsyn! Barsha qazaqstandyqtardy shyn júregimmen quttyqtaımyn! Táýelsizdigimiz baıandy bolsyn, elimiz aman, jurtymyz tynysh bolsyn! Biz, jastar táýelsiz elimizge qyzmet etemiz. Sportshylardyń atynan aldaǵy ýaqytta elimizdiń abyroıyn bıik ustap, Týymyzdy joǵary kóterip, árqashan ánuranymyzdy shyrqatyp júre beremiz dep sóz beremin. Úlken jarystarda tek jeńispen ǵana oralatyn bolamyz. Sondyqtan, jeńisti kúnderde jolyǵaıyq!», – dedi D.Eleýsinov.
Aıta keteıik, kúni keshe Táýelsizdiktiń 25 jyldyǵyna arnalǵan saltanatty jıynda D.Eleýsinov jastardyń uranyn resmı túrde bekitýdi usyndy.
«Álemdegi kóptegen memleketterdiń urandary bar. Jastardy jigerlendirip, azamattardy biriktiretin biraq aýyz sóz. Bizdiń babalarymyz da uran shaqyrylǵanda bir týdyń astynan tabylǵan. Osyǵan baılanysty sportshylardan ózińizge usynys bar. «Qazaqstan, tek qana alǵa!» degen sózińizdi elimizdiń resmı uranyna aınaldyrsaq. Bul barsha patrıottardyń máńgilik urany bolar edi», – dedi ol. Prezıdent N.Nazarbaev chempıonnyń bul usynysyn qoldady. «Muny qoldaımyn. Uranymyz – «Alǵa, Qazaqstan!» bolsyn», – dedi Qazaqstan Prezıdenti.