Reseılik kompanııa Qytaıdan Eýropaǵa Qazaqstandy aınalyp ótetin júk tasymaldaý dálizin iske qosty. Bul týraly «Evrosıb» kompanııasynyń baspasóz qyzmeti habarlady, dep jazady abctv.kz.
Mońǵolııa arqyly ótetin tranzıttik konteınerlik servıs jaqynda alǵashqy reısin júzege asyrǵan. Qytaıdyń Chýnsın provınsııasynan 3 jeltoqsanda shyqqan konteınerler Mońǵolııa arqyly Eýropaǵa 13 táýlikte jetken.
«Evrosıb» kompanııasy baspasóz qyzmetiniń habarlaýynsha, Germanııanyń DB Cargo Russija temirjol operatorymen birlesken joba 2017 jyly tolyq kúshinde jumys isteıtin bolady. Atap aıtqanda Qytaıdan Eýropaǵa júk tasymaldaý jıilep, aptasyna bir poıyz jiberiledi.
Mońǵolııa arqyly júk tasymaldaýdy «Evrosıb» byltyr bastaǵan bolatyn. Qazirge deıin Eýropaǵa 100-den astam poıyz qatynaǵan. Qosymsha kúsh qajet boldy ma, jaqynda olar bul jobany júzege asyrý úshin nemistiń DB Cargo Russija temirjol operatorymen birlesti.
Eske salaıyq buǵan deıin Eýropaǵa júk tasymaldaýda Qazaqstan negizgi dáliz bolyp kelgen edi.