Azamattyq avıasııa salasynda jolaýshy tasymalynyń kólemi turaqty ósip keledi. Úkimet otyrysynda 2025 jyldyń qorytyndysy boıynsha el áýejaılary men áýe kompanııalarynyń kórsetkishteri jáne aldaǵy damý josparlary qaraldy. Sondaı-aq halyqaralyq baǵyttardy keńeıtý, ınfraqurylymdy jańǵyrtý jáne sıfrlandyrý barysy talqylandy, dep habarlaıdy Egemen.kz.
Kólik salasynyń derekterine sáıkes, 2025 jyly Qazaqstanda 20,8 mln jolaýshy áýe arqyly tasymaldanǵan. Áýejaılar jalpy 31,8 mln adamǵa qyzmet kórsetken, olardyń ishinde Astana áýejaıy – 9,2 mln, Almaty áýejaıy – 12 mln jolaýshy qabyldaǵan.
2028 jylǵa deıin avıasııa ınfraqurylymyn damytý maqsatynda 11 iri joba júzege asyrylmaq. Onyń ishinde 4 jańa áýejaı salý, 2 ushý-qoný jolaǵyn jańartý, sondaı-aq 5 qaladaǵy áýejaı ınfraqurylymyn modernızasııalaý kózdelgen.
Bıyl halyqaralyq marshrýttyq jelini keńeıtý josparlanyp otyr. Nátıjesinde baǵyttar sany 115-ten 135 marshrýtqa, al elder sany 30-ǵa deıin artady.
Úkimet otyrysynda Prezıdent tapsyrmalary sheńberinde qabyldanǵan sharalardyń nátıjesinde otandyq áýe kompanııalar úshin avıaotyn quny tómendegeni aıtyldy. Qazirgi tańda Qazaqstan áýejaılarynda 1 tonna avıaotynnyń baǵasy shamamen 800 dollar, bul kórsetkish kórshi eldermen salystyrǵanda básekege qabiletti.
Osy saıasattyń nátıjesinde Qazaqstan áýejaılaryna jańa sheteldik áýe tasymaldaýshylary kele bastady. Olardyń qatarynda Centrum Air (О́zbekstan), Shiraq Avia (Armenııa), Martinair (Nıderland), One Air (Ulybrıtanııa), Atlas Air (AQSh), MNG Airlines (Túrkııa) jáne ózge de kompanııalar bar.
Jıynda «KTZ Air Cargo» AQ júk áýe kompanııasynyń marshrýttyq jelisin damytý josparlary da qaraldy. Kompanııanyń negizgi maqsaty – eldiń kólik júıesiniń turaqtylyǵyn arttyrý jáne júk tasymalynyń geografııasyn keńeıtý.
Ushqyshsyz avıasııa ortalyǵy
Sonymen qatar Premer-mınıstr shaǵyn avıasııa salasynda kemshilikter bar ekenin atap ótti. Ol áýe kemelerin satyp alýdy jáne osy baǵyttaǵy avıakompanııalardy qarjylandyrý tetikterin jetildirý qajettigin aıtty.
Keńeste avıasııa jáne jalpy kólik salasyn sıfrlandyrý máseleleri de kóterildi. Qazirgi tańda Qazaqstannyń kólik qatynasy álemniń 42 elimen júzege asyrylady. Sheteldik ruqsat blankileriniń sany 2022 jylmen salystyrǵanda 3 ese artqan.
Rásimderdi jeńildetý maqsatynda ruqsat berý júıesi tolyq elektrondy formatqa kóshirildi. Sonymen qatar CarGoRuqsat júıesi engizildi, Qytaımen sheksiz ruqsat almasý qamtamasyz etildi, al blankilerdiń 70% sıfrlandyryldy.
Bıylǵy naýryz aıynda Túrki memleketteri uıymy elderimen e-Permit pılottyq jobasy iske qosyldy, sondaı-aq halyqaralyq tasymaldar úshin e-CMR júıesi boıynsha pılottyq joba bastaldy. Bul bastamalar rásimderdiń ashyqtyǵyn arttyryp, ýaqyt pen ákimshilik shyǵyndy qysqartýǵa baǵyttalǵan.
Premer-mınıstr halyqaralyq seriktestermen birlesip sheteldik ruqsat blankilerin tolyq sıfrlyq formatqa kóshirý jumystaryn jalǵastyrýdy tapsyrdy.
«Prezıdent atap ótkendeı, tranzıt – bizdiń elimizdiń basty básekelestik artyqshylyqtarynyń biri ekenin árdaıym aıtyp keledi. Degenmen, tapsyrmalardyń oryndalýyna syn-eskertpeler bar, tolyq qamtý men jedeldik jetispeıdi. Men dınamıkany tikeleı ózim qadaǵalaıtyn bolamyn. Bizdiń mindetimiz – jumystyń barlyq baǵyttary boıynsha kúsh jumyldyrý», dedi Oljas Bektenov.
Osylaısha, avıasııa salasyn damytý baǵytyndaǵy keshendi sharalar Qazaqstannyń halyqaralyq kólik-tranzıttik hab retindegi pozısııasyn nyǵaıtýǵa baǵyttalyp otyr.
Áýe tasymalynyń áleýeti zamanaýı avıasııalyq habqa aınalýy kerek