Aqyn da, dana da, batyr da anadan týady. Ultty ult etetin – ana. Aıaǵy aýyr áıel tutas Jer sharyn kóterip bara jatqandaı áser beredi. Qostanaı qalasy ákimi janyndaǵy áıelder isi jáne otbasylyq-demografııalyq saıasat jónindegi ulttyq komıssııa men Salamatty ómir saltyn qurý problemalarynyń oblystyq ortalyǵy birlesip aıaǵy aýyr kelinshekterdiń «Arýana» baıqaýyn ótkizdi.
Baıqaýǵa qatysqan jeti áıeldiń arasynda tuńǵyshyn kútip júrgender de, tórtinshi sábıine aıaǵy aýyr ana da boldy. Qostanaı qalasyndaǵy №11 orta mekteptiń bastaýysh synyp muǵalimi Áıgerim Tapaeva tuńǵyshyn dúnıege ákeledi, amandyq bolsa. Ol úshin ómirde barlyǵy da retimen kele jatyr. Mektepti bitirdi, pedagogıka kolledjine túsip, bastaýysh synyptar muǵalimi mamandyǵyn ıgerdi. Biraq qyz bala úshin turmys quryp, ómirge sábı ákelý barlyǵynan da bıik turady. Áıgerim de ótken jyly turmysqa shyqty, bir áýlettiń kelini atandy.
– Qyzdar úshin jaýapkershik árqashan da joǵary. Otbasyn qurǵanda shańyraqtyń bıik, tabaldyryqtyń berik bolýy kelinge kóp baılanysty. Bolashaq sábıimizdi kútip júrmiz, ol úshin de ananyń jaýapkershiligi jeterlik. Men baıqaýǵa qatysýǵa shaqyrtý alǵanda oǵan qatysý nemese qatyspaý jóninde kóp oılandym. Sonan soń qatysýǵa táýekel ettim. О́ıtkeni, aldymen bul baıqaýdyń zamandastarym úshin tárbıelik máni bolatynyn eskerdim, sol ıgi sharanyń qarlyǵashtarynyń biri bolýdy jón kórdim, – deıdi Áıgerim Tapaeva.
Baıqaýdyń sharty boıynsha qatysýshylar aldymen ózderin tanystyrdy, odan keıin ózderiniń bala kezdegi nemese balalarynyń súıikti oıynshyǵy, jaqsy kóretin balalar kitaby týraly aıtyp berdi. Sońǵy shart boıynsha kelinshekter sán kóılegimen jurtshylyq aldyna shyqty. Eń sulý, eń súıkimdi áıel aıaǵy aýyr ana ekenin olar taǵy da dáleldegendeı boldy. Uıymdastyrýshylar bul baıqaýdyń tárbıelik máni bolýy úshin er kisilerdiń de úles qosýyn oılastyrypty. Aıaǵy aýyr kelinshekterdiń ónerin quramynda kóp balaly áke Aleksandr Mınko, Áıelder men balalarǵa arnalǵan beıimdeý ortalyǵynyń dırektory Dilmuhamed Spanov jáne Qostanaı qalalyq perınataldy ortalyqtyń bas dárigeri Tatıana Býlgasevıch bar qazylar alqasy baǵalady. Sonymen qatar, zalda kelinshekterdiń otaǵasy, týystary, ujymdastary olarǵa jankúıer boldy.
Baıqaý bolǵanymen qazylar alqasy qatysýshylardyń barlyǵyna birdeı oryn berdi. Bireýin ekinshisinen artyq-kem etken joq.
– Búgingi baıqaýda dostyq jeńdi. Qatysýshy analardyń barlyǵy da júziktiń kózinen ótkendeı ádemi, aqyldy. Aıaǵy aýyr arýanalardy qansha baıqaý bolǵanymen jiktep jatqanymyz durys bolmas edi. Olar erteń aman-esen bosanyp, aıaq-qolyn baýyryna jınap alsyn. О́mirge deni saý, baqytty sábıler ákelsin. Búgingi olardyń sahnaǵa shyǵýynyń ózi bizdiń qyz-kelinshekter úshin úlgi-ónege, – dedi Tatıana Býlgasevıch.
Dástúrdi, ulttyq tárbıeni, adamgershilik pen áıeldik danalyqty, náziktikti pash etken tuńǵysh baıqaý aldaǵy jyldary dástúrli ótip, mazmun jaǵynan baıytyla túsetin bolady.
Názıra JÁRIMBETOVA,
«Egemen Qazaqstan»
QOSTANAI