«Báıterek» ulttyq holdınginiń uıytqy bolýymen Qazaqstan – Iran iskerlik keńesiniń 3-otyrysy ótti. Bul shara eki el arasyndaǵy bıznes-forým sheńberinde uıymdastyryldy. Otyrysty Investısııalar jáne damý mınıstri Jeńis Qasymbek pen Iran Islam Respýblıkasy prezıdenti ákimshiliginiń basshysy Mohommad Nahavandıan ashyp, júrgizip otyrdy.
Qazaqstan men Iran arasyndaǵy iskerlik baılanystyń tamyry tereńde. Eki eldiń dostyq ráýishtegi qarym-qatynasyna keler jyly shırek ǵasyr tolmaq. Ekijaqty kelisimniń naqty nátıjeleri saýda-ekonomıkalyq, ınvestısııalyq áriptestik salasynda aıqyn kórinis taýyp otyr.
– Memleketaralyq baılanystyń sheńberinde Iran kásipkerleriniń otandyq naryqtaǵy qyzmetin jolǵa qoıýyna barynsha múmkindikter qarastyrylǵan. Investısııalyq jobalar men saýda operasııalarynyń kedergisiz atqarylýyna Qazaqstan tarapynan qoldaý bar. Úkimettik baǵdarlamalardyń negizgi operatory bolyp tabylatyn «Báıterek» holdıngi tarapynan qazaqstandyq kásipkerlerdiń Iran naryǵyna shyǵýyna da jaǵdaı jasalýda. Bul jumys nátıjesiz emes. Eki el iskerleriniń búgingi bas qosýy dástúrli baılanystardyń jańasha sıpatta damýyna serpin beretini anyq. Osy maqsatta biz Iran damý ınstıtýttarymen seriktestikti belsendi damytýdamyz, – dedi otyrysta sóz alǵan «Báıterek» ulttyq holdıngi AQ basqarma tóraǵasy Erbolat Dosaev.
Al buǵan deıin ótken Qazaqstan – Iran iskerlik keńesiniń otyrysynda aýyl sharýashylyǵy, munaı óńdeý sektory jáne mashına jasaý salalarynda birigip atqarylatyn ister aıqyndalǵan edi. Atap aıtqanda, «Báıterek» ulttyq basqarýshy holdıngi» AQ pen Irannyń Ulttyq damý qory arasyndaǵy yntymaqtastyq týraly memorandým jasalyp, jalpy quny 1 mlrd AQSh dollary shamasyndaǵy 48 túrli kelisimge qol qoıylǵan bolatyn.
Qalmahanbet MUQAMETQALI,
«Egemen Qazaqstan»