22 jeltoqsan kúni Fransııanyń batysynda kún batareıalary bar paneldermen jabdyqtalǵan álemdegi alǵashqy avtojol ashyldy. Saltanatty sharaǵa osy eldiń Ekologııa, turaqty damý jáne energetıka mınıstri Segolen Rýaıal qatysty, dep habarlaıdy TASS. Mınıstr shara barysynda bul joba basqa da memleketterdi qyzyqtyratynyna úmittenetinin aıtty.
"Marrakeshtegi BUU-nyń klımat týraly konferensııasynda bir jyl buryn osy joba tanystyrylǵan bolatyn. Myna joldyń betine kún sáýlesin elektr energııasyna aınaldyratyn panno ornalastyrylǵan. Ol aýyl sharýashylyǵyna qajetti jerlerdi únemdeýge múmkindik beredi", - dedi mınıstr.
Atalǵan jol Týrývr qalasynda ornalasqan. Qazir paıdalanýǵa joldyń alǵashqy kılometri berildi. Ol jerde 28 sharshy metr kún batareıalary bar. Memleket qarjylyq qoldaý kórsetken jobaǵa jalpy 5 mln eýro ketken. Al kún batareıalary 5 myń turǵyny bar qalany elektr energııasymen qamtýǵa múmkindik beredi dep kútilýde.
Mınıstrdiń aıtýynsha, Fransııada 2017 jyly jańa damý baǵdarlamasy qabydanady. Baǵdarlama aıasynda 5 jyldyń ishinde myń kılometr joldy kún panelderimen jabdyqtaý josparlanýda.
Bir aıta keterligi, eń alǵash kún batareıalary tájirıbe retinde Nıderlandyda velosıped jolyna qoldanylǵan. Basynda kún batareıalarynyń qys kezinde tez tozyp ketetini baıqalǵan. Keıin mamandar bul kemshilikti joıdy. Endi Germanııa Keln qalasynyń mańynda kún batareıalary bar jol salýdy josparlap otyr.