Qazaqfılm» aýmaǵynda arnaıy ekonomıkalyq aımaqty qurýdy josparlanyp otyr, dep habarlaıdy QazAqparat.
Qazaq ǵylymı-zertteý mádenıet ınstıtýtynyń bas dırektory Andreı Hazbýlatov Astanada ótken «dóńgelek ústelde» QR «Kınematografııa týraly» zań jobasyn tanystyrdy.
Osy oraıda sharaǵa qatysýshylar úshin salany damytý boıynsha arnaıy fılm kórsetildi.
«Kınematografııany damytýdyń basym baǵyttary aıasynda «Qazaqfılm» kınostýdııasy aýmaǵynda kınematografııany uıymdastyrý úshin arnaıy ekonomıkalyq aımaqty qurý eskerilgen. Salyqtyq jeńildikterdi engizý men prokatty, fılmder kórsetilimine baılanysty qyzmetterdi jáne jumystardy qosylǵan qun salyǵynan bosatý máselesi qamtylyp otyr», – dep atap ótilgen tanystyrylymda.
Sonymen qatar zań jobasynda fılmdi dýblıajdaý nemese sýbtıtrleý, kadr syrtynda aýdarý kezinde memlekettik tildi paıdalanýdyń mindettemesin bekitetin normalardy qabyldaý qarastyrylǵan.
Bul qujatta telearnalarda qazaqstandyq kınony jarnamalaý úshin efır ýaqytyn mindetti túrde bólý normasy da eskerilgen. Jalpy, salany damytý jolynda Ulttyq kınony qoldaýdyń memlekettik qoryn qurý men onyń janynda Sarapshylyq keńesti jasaqtaý kózdelip otyr.
Aıta keteıik, zań jobasyn ázirleý bastamasy kınematografııa salasyndaǵy quqyqtyq retteý tıimdiligin arttyrý, qoldanystaǵy zańnamadaǵy jáne sabaqtas salalardaǵy kemshilikterdi joıý qajettigimen bekitildi. Bul qujatty qabyldaý ulttyq kınoóndiristi qoldaýǵa, ulttyq fılmderdiń prokaty jáne dıstrıbýsııasy salasynda qolaıly jaǵdaı jasaýǵa, sondaı-aq el aýmaǵynda, álemde qazaqstandyq kınonyń sapasy men básekege qabilettiligin arttyrýǵa negizdelgen birqatar sharalardy qamtıdy.