Oral qalalyq máslıhatynyń kezekti IH sessııasynda shahardyń 2017-2019 jyldarǵa arnalǵan bıýdjeti bekitildi, dep habarlaıdy QazAqparat.
Qalalyq ekonomıka jáne bıýdjettik josparlaý bóliminiń basshysy Bıbigúl Nıetqalıevanyń málim etkenindeı, 2017 jylǵa 21 mlrd 887,584 mln teńge, 2018 jylǵa 20 mlrd 776,991 mln teńge, 2019 jylǵa 21 mlrd 355,237 mln teńge qaraldy.
Aldaǵy jyl enshisindegi qarjynyń 2 408,9 mln teńgesi respýblıkalyq jáne oblystyq transfertter bolsa, 19 478,7 mln teńgesi - qalalyq bıýdjettiń óz kirisi. Osynyń 3 mlrd 49,153 mln teńgesi eńbekaqy tóleý júıesiniń jańa úlgisi boıynsha jalaqy tóleýge jáne aı saıynǵy ústemeaqy tólemine, sondaı-aq memlekettik ákimshilik qyzmetshilerdiń eńbekaqysyn kóterýge baǵyttalmaq.
Bilim salasyna 10 mlrd 452 mln teńge, mádenıet jáne tilderdi damytý bólimine 465 mln teńge, jumyspen qamtý jáne áleýmettik baǵdarlamalar bólimine 1,3 mlrd teńge, dene shynyqtyrý men sportqa 250 mln teńge, ishki saıasatqa 52 mln teńge, qarjy bólimine 502,9 mln teńge, maldárigerlik bólimine 41,6 mln teńge jumsalmaq.
Qurylys salasyna 1,8 mlrd teńge bólinip, ol jańa úsh úıdiń jobalaý-smetalyq qujattamasyn jasaýǵa, basqa da jumystarǵa ketpek. Qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine de qajetti qarjy berilip otyr.