Qaraǵandy oblysynyń Shahtınsk qalasyna qarasty Shahan kentindegi turǵyn úı qazandyqtyń jarylýynan qulaǵan, dep habarlaıdy «QazAqparat».
«Turǵyn úı qazandyqtyń jarylýynan qulaǵan. Shahandaǵy birqatar turǵyn úılerge jylý avtonomdyq júıe arqyly beriledi. Bul qazandyq úı komıtetiniń esebinde boldy. Qazir tótenshe jaǵdaıdyń saldaryn joıý jáne sebebin anyqtaý boıynsha oblystyq komıssııa quryldy», - dedi oblys ákimi Nurmuhambet Ábdibekov.
Málimetterge sáıkes, kópqabatty úıde 118 turǵyn mekendegen, al TJ oryn alǵan kezde qulaǵan bóliginde shamamen 30 adam bolǵan. Sonymen qatar, oqys oqıǵaǵa qatysty qylmystyq is qozǵaldy.
«TJ deregine qatysty materıal QR QK-niń 292-babynyń 3 tarmaǵy (Adam ólimine ákep soqtyrǵan órt qaýipsizdigi talaptaryn buzý) boıynsha sotqa deıingi tergeý jumystarynyń tizimine tirkeldi», - dep habarlady Qaraǵandy oblystyq IID.
Aıta keteıik, keshe 22:40 shamasynda oblystyq TJD-ǵa kópqabatty úıdiń opyrylǵany týraly habarlanǵan. Sońǵy málimetter boıynsha, úıindi astynan 9 adamnyń denesi shyǵaryldy. Olardyń úsheýi - er adam, úsheýi - áıel adam, úsheýi - búldirshin.