«Benfıka» komandasy áli de «Astananyń» jartylaı qorǵaýshysy Nemanıa Maksımovıchti óz qatarlaryna qosyp alýǵa nıetti. Bul týraly sports.kz habarlady.
O Jogo basylymynyń málimeti boıynsha, Maksımovıchtiń ókilderi portýgal fýtbol klýbynyń prezıdenti Lýısh Felıpe Vıeıromen jaqyn kúnderi kezdesýi tıis.
Aıta keteıik, buǵan deıin 21 jastaǵy havbekke Portýgalııanyń taǵy bir klýby «Sportıng» te qyzyǵýshylyq tanytqan bolatyn. Alaıda, naqty usynys jasalmaǵandyqtan is aıaqsyz qaldy.
Nemanıa Maksımovıch elordalyq ujymnyń sapyna 2015 jyldyń aqpan aıynda kelgen. Búginge deıin eki márte el chempıony atanyp, bir ret Qazaqstan Kýbogynda jeńiske jetken. Premer-lıgada 54 oıynǵa qatysyp, 9 goldyń jáne 6 nátıjeli pastyń avtory atandy. Sonymen qatar, óz klýbyn Chempıondar lıgasy men Eýropa lıgasynyń toptyq kezeńine ótýine septigin tıgizgen.