El Táýelsizdiginiń 25 jyldyǵy qurmetine Shardarada jańadan boı kótergen sport kesheni saltanatty túrde ashylyp, iske qosyldy, dep habarlady aýdan ákimdiginiń baspasóz qyzmeti.
Ashylý saltanatynda aýdan ákiminiń mindetin atqarýshy Tursynqul Baıturǵanov quttyqtaý sóz sóıledi.
«Ardaqty aǵaıyn! Búgin shaǵalaly óńirde záýlim sport kesheni paıdalanýǵa berilip jatyr. Oblystyq bıýdjetten bólingen 368 mln 995 myń teńgege 260 oryndyq zamanaýı úlgide sport ǵımaraty turǵyzyldy. Álemdik daǵdarysqa qaramastan osyndaı áleýmettik nysanǵa memleket tarapynan qarjy bólinýi elimizdiń ekonomıkalyq jaǵdaıynyń qarqyndy damyp kele jatqanyna dálel bola alady», - dedi ol.
Shardaralyqtardyń qýanyshyn sport salasynyń ardageri Baqyt Jańbyrbaev, oblystyq dene shynyqtyrý jáne sport basqarmasy basshysynyń orynbasary Aıtjan Berdashov, aýdannyń ardager sportshysy Orazbaı Nazarbekov, jáne basqalar bólisip, jańa ǵımarattan álem tanıtyn sport juldyzdary shyǵa berýlerine tilektestigin bildirdi.
Aıta ketken jón, jańa ǵımaratta №2 aýdandyq balalar men jasóspirimder sport mektebi ornalasady. Munda boks, qazaq kúresi, dzıýdo, grek-rım kúresi, erkin kúres, taekvondo, jeńil atletıka, fýtbol jáne shahmat tárizdi sport túrleri boıynsha 1200 jas jattyqpaq. Sport kesheniniń ǵımaratynda oblystyq deńgeıden bastap, respýblıkalyq jáne halyqaralyq deńgeıdegi jarystar uıymdastyrylatyn bolady.
Resmı túrde paıdalanýǵa berilgen jańa Sport kesheninde osy kúni alǵashqy oıyndar bastalyp ketti. Aýdandyq dene shynyqtyrý jáne sport bóliminiń uıymdastyrýymen jasóspirimder arasynda qazaq kúresinen Ońtústik Qazaqstan oblysynyń kýbogy úshin týrnır uıymdastyrylyp, oǵan Shymkent qalasy men basqa da aýdandardan jas palýandar qatysty. Tartysty ótken palýandar saıysynda Shardara aýdanynyń sportshylary komandalyq esep boıynsha birinshi oryndy jeńip aldy. Al ekinshi oryndy Túrkistan qalasynyń jas palýandary enshilese, III oryn Shymkent qalasynan kelgen sportshylarǵa buıyrdy.
Jeńimpazdar syı-sııapatpen marapattalyp, I orynǵa 300 myń, II orynǵa 200 myń, III orynǵa 100 myń teńge júlde tapsyryldy.