Keıki batyrdyń súıegin izdeıtin ekspedısııa jolǵa shyqty

Astanadan shyqqan ekspedısııa aldymen Arqalyq qalasyna soǵyp, sondaǵy Y.Altynsarın atyndaǵy pedagogıka ınstıtýtynyń professorlyq quramy jáne stýdentter qaýymymen kezdesti. Arqalyqtaǵy bul bilim ordasy rektor Seıitbek Qýanyshbaevtyń basshylyǵymen ekspedısııanyń arheologııalyq tobyna jan-jaqty qoldaý kórsetti.   Kezdesýde ekspedısııa jetekshisi,  L.N.Gýmılev atyndaǵy Evrazııa ulttyq ýnıversıtetiniń rektory, tarıh ǵylymdarynyń doktory, akademık Erlan Sydyqov ekspedısııa maqsaty týraly aıtyp berdi.  «Elbasy Nursultan Nazarbaevtyń «Bolashaqqa baǵdar:rýhanı jańǵyrý» atty baǵdarlamalyq maqalasynda aıtylǵan alty baǵyttyń biri jas urpaqty týǵan jerdi súıýge tárbıeleýge arnalǵan. Týǵan jerdiń tarıhyn  bilmeı ony qadirleý, maqtanysh tutý sezimi bolmaıdy. El Táýelsizdigi úshin shybyn janyn qıǵan, basyn oqqa baılaǵan Keıki atamyzdyń bas súıegin bir ǵasyrǵa jýyq ýaqyttan keıin aldyryp otyrmyz.Endi onyń dene súıegin taýyp, týǵan jer qoınyna tapsyrý búgingi urpaqtyń tarıhı, qasıetti paryzy. Mine osy maqsatpen jolǵa shyqtyq»   dedi Erlan Battashuly. Quramynda tarıhshy, folklorshy ǵalymdar men aqyndar, ólketanýshylar, arheologtar,jýrnalıster bar «Týǵan jerim—altyn besigim» aqparattyq-tanymdyq ekspedısııasy Keıki Kókembaıulynyń súıegi qalǵan  jerdi anyqtaıdy, súıegin izdeıdi, batyrdyń súıegi men bas súıegin qaıta jerleıtin oryndy, keseneniń qurylys jumysyn kóredi, ólkeniń mánajat oryndaryn , qasıetti jerlerin zertteıdi, jergilikti folklordy, salt-dástúrlerdi, Keıki batyr týraly el aýzyndaǵy áńgimelerdi jınaıtyn bolady. Arqalyq qalasynyń ákimi Amantaı Balǵarın ekspedısııa múshelerin Keıki batyrdyń súıegi men bas súıegin qaıta jerleý rásimi ótetin sharaǵa qalanyń daıyndyǵy jóninde habardar etti. Kezdesýde ekspedısııa músheleri, elimizge belgili aıtys aqyndary Serikzat Dúısenǵazy men Dáýletkereı Kápuly Keıki baba týraly óleńderin oqyp, jurtshylyqtyń rýhyn kóterip tastady.  Ekspedısııa músheleri  Erlan Sydyqov, aqyn Jumash  Somjúrek, Arqalyq pedagogtka ınstıtýtynyń rektory Seıitbek Qýanyshbaev kezdesýge qatysýshylardyń suraqtaryna jaýap berdi.   Ekspedısııa Keıki batyr kesenesiniń  quryly júrip jatqan Amangeldi aýdany men  súıegi izdestiriletin Jylanshyq ózeni boıyna qaraı júrip ketti. Názıra Járimbetova, «Egemen Qazaqstan» QOSTANAI