Sharany Ult kóshbasshysy - QR Tuńǵysh Prezıdenti Qory uıymdastyrdy. Kórmege Almaty men Qaraǵandy qalalarynyń kózi nashar kóretin balalarǵa arnalǵan arnaıy mektep-ınternaty tárbıelenýshileriniń jumystary qoıylǵan.
- Búgin bizde óte aýqymdy joba qolǵa alyndy ári onyń balalar úshin mańyzy zor. Maǵynaly, mándi qadam jasadyq. Bastama - kózi nashar kóretin balalardy áleýmettik jaǵynan beıimdep, olardy qoǵammen biriktirýge baǵyttalyp otyr. Sonymen qatar, olardy sýret óneri álemine shaqyryp, talantty, kópqyrly múmkindikterin ashý, - deıdi Ult kóshbasshysy - QR Tuńǵysh Prezıdenti Qorynyń atqarýshy dırektory Qanat Jumabaev.
Aǵymdaǵy jyldyń sáýir aıynda QR Fransııa Elshiligi jáne Almaty qalasyndaǵy fransýz Alıansymen birlesken joba aıasynda Prezıdent Qory mektep-ınternattyń oqýshylaryna sýretke túsirý óneri boıynsha fransýzdyń tanymal sýret sheberi Erık Vazzolermen sheberlik synybyn uıymdastyrdy. Joba maqsaty – balalardy sýret ónerine baýlý, fotoapparattar men smartfondarǵa túsirilgen sýretter arqyly olardyń ómiri jaıly baıandaý. Budan bólek, Erık orys tilin jaqsy meńgergen, sáıkesinshe balalalarmen baılanysýda tildik kedergi bolǵan joq.
Sýretshiniń zaǵıp balalar men kózi nashar kóretinderge arnalǵan arnaıy ádistemesi joq. Degenmen, ol 30 jyldan beri Fransııa, Germanııa, Polsha jáne TMD elderiniń osyndaı sanattaǵy balalarymen jumys istep keledi.