Kezdesýde Nursultan Nazarbaev pen Rýstam Mınnıhanov Astana men Qazan arasyndaǵy mádenı jáne ekonomıkalyq yntymaqtastyq máselelerin talqylady.
Memleket basshysy R.Mınnıhanovty Reseı kúnimen quttyqtap, eki el arasynda qalyptasqan dostyq qatynastar týraly aıtty.
– Reseımen de, Tatarstanmen de aramyzda dostyq qarym-qatynas ornyqqan. Qazaqtar men tatarlar tarıhy, mádenıeti, tili men ádet-ǵurpy jaǵynan bir-birine óte jaqyn. Ekonomıkalyq baılanystarymyz da jaqsy. «KAMAZ» kásipornymen jumys júrgimiz kelemiz, Almatydaǵy tikushaq zaýytyna qatysty jobany iske asyrýdamyz. Osy jáne basqa da ekonomıkalyq baılanystardy, sonyń ishinde munaı hımııasyna qatysty baılanysty jalǵastyra berý kerek.
Tatarstan Prezıdenti Qazaqstanǵa kelgen mıssııasy týraly aıtyp, elordamyzdyń jańa arhıtektýralyq nysandaryn jáne «Astana EKSPO-2017» kórme keshenin aralap kórgennen keıingi áseri jóninde oı bólisti.
– Búgin EKSPO-daǵy ekspozısııamyzdy ashtyq. Sonymen qatar, Qazaqstandaǵy seriktesterimizben birge bolashaq josparlarymyzdy talqyladyq. Kórme kesheni meni qaıran qaldyrdy. Sizdi kórmeniń ashylýymen quttyqtaımyz. Sondaı-aq, qala kóshesine Súıimbıkeniń aty berilýine oraı rızashylyǵymdy bildiremin, – dedi R.Mınnıhanov.
Nursultan Nazarbaev pen Rýstam Mınnıhanov «Batys Qytaı – Batys Eýropa» jolyn salý aıasyndaǵy ınfraqurylymdyq jobalardy iske asyrý jáne Qazaqstan men Tatarstannyń kóliktik-tranzıttik áleýetin arttyrý máselelerin talqylady.
Kezdesý sońynda R.Mınnıhanov Qazaqstan Prezıdentin «Tatarstan Respýblıkasyna sińirgen eńbegi úshin» ordenimen marapattap, Memleket basshysyn Tatarstanǵa kelýge shaqyrdy.