«Parlament Senaty depýtattyǵyna Atyraýdan 3 úmitker tirkeldi», dedi óńirlik kommýnıkasııalar qyzmetinde ótken brıfıngte oblystyq aýmaqtyq saılaý komıssııasynyń tóraǵasy Asaý Ibrashev.
Olar: oblys ákiminiń birinshi orynbasary Ǵumar Dúısembaev, «Qarabýra» sharýa qojalyǵynyń basshysy Qarshyǵa Jaýymbaev jáne «Dostan ata» sharýa qojalyǵynyń basshysy Seıitjan Baljigitov. Eki kandıdat ózin-ózi usynsa, Ǵumar Dúısembaevtyń kandıdatýrasy Inder aýdandyq máslıhaty men oblystyq máslıhattyń sheshimi negizinde usynylǵan. Senat depýtattyǵyna úmitkerler men ókilderine tirkelý kýálikteri tapsyryldy.
«Bıylǵy saılaýdyń ereksheligi kóp, – deıdi Asaý Ibrashev. – Saılaýshylar elektrondyq júıe arqyly tirkeledi. Saılaýshylardyń monıtorıngi onlaın rejimde Ortalyq saılaý komıssııasynyń veb-saıtynda kórsetiledi. Senat saılaýyna oblystaǵy túrli deńgeıdegi máslıhattardyń 132 depýtaty qatysady.
Baqytgúl BABASh, «Egemen Qazaqstan»