Qala ákimi Baýyrjan Baıbek qýanysh ıelerin quttyqtap, páter kiltin óz qolymen tabys etti. Baspanaly bolǵandardyń qatarynda múgedekter, kópbalaly jáne tolyq emes otbasylar, memleket jáne bıýdjet qyzmetkerleri, áskerı salanyń mamandary bar. Jańa úıdiń ıeleri atanǵan turǵyndardyń qýanyshynda shek joq. Atalǵan qalashyqta turǵyndar úshin barlyq jaǵdaı jasalǵan. 14 turǵyn úı ornalasqan Atletter aýylynyń kesheni 23 gektar aýmaqty alyp jatyr. Onyń aınalasy zamanaýı vıdeobaqylaý júıesimen, órt qaýipsizdigimen tolyq qamtylǵan. Halyqqa qyzmet kórsetý ortalyǵy, emhana, sýpermarket, sulýlyq salony, bank jáne pochta bólimshesi, polısııanyń tirek pýnkti jumys istep tur. Jańa qonystanýshylar úshin «Almaty arena» sport kesheniniń seksııalarynda jattyǵý jasaý úshin tolyq múmkindik bar.
Sońǵy 5 jyl ishinde Almatyda 10 myńnan astam páter úlestirilgen. Aǵymdaǵy jyldyń aıaǵyna deıin taǵy da 4,5 myń páter óz ıesin taýyp,kezekte turǵan árbir tórtinshi otbasy baspanaly bolmaq. – Atletter aýylynda qazirgi kezde 1748 páter bar. Turǵyn úı basqarmasy turǵyn úı komıssııasynyń súzgisinen ótken 1655 páter ıeleriniń tizimin jiberdi. Jalǵa berilip, keıin satyp alatyn 900 páter ıelerimen kelisim jasaldy. Qazirgi kezde qalada turǵyndarǵa páter bólý sheshimderiniń barynsha ashyq júrýi úshin qajetti sharalardyń barlyǵy jasalýda. Páter kezeginde turý, onyń jyljýy tek elektrondy rejımde júrgizilip, elektrondy úkimet portalynda júzege asady. Sonymen qatar, alǵash ret kezektiń elektrondy ınventarızasııasy engizilgen, ıaǵnı kezekte turǵandar jyl saıyn Turǵyn úı basqarmasyna kelmeı-aq dıstansııalyq júıe arqyly ózine qatysty málimetti bile alady. Bulardan ózge, adamı faktorsyz, kezekte turǵandar arasynda avtonomdy keste arqyly páter bólý mehanızmi de jyl aıaǵyna deıin engiziledi. Onyń ústine Atletter aýylyndaǵy páterlerden úmitkerler tizimi Almaty qalasynyń prokýratýrasymen kelisilgen – deıdi jaýapty mamandar.
Bir aıta keterlik jaıt, atalmysh turǵyn úıler ornalasqan Alataý aýdany qala turǵyndary men qonaqtary qyzyǵatyn erekshe zamanaýı eldi mekenge aınalyp keledi. Aýdan qurylǵaly beri turǵyndar sany 1,5 esege artyp, 200 myń adamǵa jetti. Segiz jyl ishinde jańa aýdandy damytýǵa qala bıýdjetinen 200 mlrd. teńgeden astam qarjy bólingen.
Arman OKTIаBR,
«Egemen Qazaqstan»
ALMATY