Kanadalyq Cirque du Soleil trýppasy taǵy da Astanada. Búgin kórme alańynda EKSPO-2017 kórmesiniń qonaqtary úshin arnaıy ázirlengen «Reflekt» shoý-baǵdarlamasynyń tusaýkeseri ótedi. Beıkúná janýarlardy qınamaı-aq qyzyqqa toımaıtyn buqarany tańqaldyrýǵa bolatynyn dáleldep júrgeni úshin kóptiń qoshemetine ıe erekshe ujym qatarynda eń talantty, tańdaýly mamandar shoǵyrlanǵan. Túrli janr aralasqan mıýzıkl qoıylymynda sırk ártisterinen bólek mýzykanttar men ánshiler de óner kórsetetin bolady.
«Reflekt» Cirque du Soleil bas dırektory Bernard Poırıeniń sózinshe, shoý jumysyna 160-qa jýyq sırk qyzmetkerleri atsalysqan. «Reflekt» shoýy arqyly qazaq eliniń baı mádenıetin barshaǵa tanytqymyz keledi degen ol shoý-baǵdarlamanyń ereksheligine toqtaldy.
– Jobada Cirque du Soleil tarıhynda esh jerde buryn-sońdy qoıylmaǵan jańa trıýktar kórsetiledi. Tek osy úshin ǵana myńdaǵan kórermen kelýi tıis dep oılaımyz. Qazaq elin qonaqjaılyǵy úshin unatamyn. Sizderdiń energetıkalaryńyzdy seziný bizdiń ártisterimiz úshin baqyt, – deıdi bas dırektor Bernard Poırıe.
Batystyq úılesimmen árlengen halyq ómiriniń ár kezeńdegi tynys-tirshiligi beınelengen ulttyq mýzyka mazmunynan lırıkalyq, epıkalyq, qaharmandyq lep esedi. Sıýjet mazmunyna toqtalǵan shoýdyń atqarýshy dırektory Danıel Forte osy taraptaǵy izdenisteri týraly aıtyp berdi.
– Toǵyz aı tolyǵymen shoýdyń daıyndyǵyna ketti. Osy ýaqyt aralyǵynda kanadalyq kompozıtor Saımon Karpentıe qazaq ulttyq mýzykasynyń elementterin paıdalana otyryp, dybystyq kórkem beınege negizdelgen oıyn-saýyq mýzykasyn jazdy. Al kostıým jónine keletin bolsaq, Sırk Dıý Soleı qazaq halqynyń ulttyq naqyshyndaǵy kostıýmderdi arnaıy tiktirdi, – deıdi Danıel Forte.
Shoý barysynda kórinis tapqan saq taıpasynyń jas kósemi altyn adam, semantıkalyq jáne tarıhı túp-tamyry tereń mańyzdy tıpologııalyq obraz bolyp sanalatyn qanatty tulparlar Uly dala kóshpendileriniń rýhyn asqaqtata túsetini sózsiz.
Kanadalyq tanymal horeograf Lıdııa Boýsher teatrlandyrylǵan sırk baǵdarlamasynyń eń qyzyqty akrobatıkalyq nomerlerin ázirlegen. Áýede aınalyp turǵan dóńgelektiń syrtyn aınala zyr júgirgen akrobattar ekvılıbrıstıka shoýynyń túr-túrin kórsetse, bashpaılarymen sadaq tartatyn qos bıshi qyz eptiligimen tánti etedi.
Jalpy, sırk jaz boıy Astanada 71 qoıylym sahnalaýdy josparlap otyr. Cirque du Soleil Kanadanyń Monreal qalasynda 1984 jyly qurylǵan. Erekshe dızaıny men bıi arqyly talaıdy tańqaldyryp kele jatqan sırk qazirgi tańda oıyn-saýyq ındýstrııasyndaǵy alyp kompanııalardyń birine aınalǵan. Sırk ujymynda álemniń 50 elinen jınalǵan 4000-ǵa jýyq adam eńbek etedi.
Aıa О́MIRTAI,
"Egemen Qazaqstan"