«Táýelsizdiktiń alǵashqy jyldarynda qurylǵan qoǵamdyq ınstıtýt jumysynyń nátıjesi – elimizdegi kelisim, birlik, turaqtylyq». Atyraý oblystyq Qazaqstan halqy Assambleıasynyń XXI sessııasynda aımaq basshysy Nurlan Noǵaev osylaı dedi. «El ómirindegi asa mańyzdy baǵdarlamalardy oryndaýǵa Assambleıa tolyqqandy qatysa alady. Memleket basshysynyń maqalasyndaǵy negizgi mindetterge nazar aýdarsaq, olar qoǵamnyń sanasyn jańǵyrta otyryp, el damýyn jańa sapalyq deńgeıge kóterýdi kózdeıdi. Ultyn súıip, ult taǵdyryn óz taǵdyrymen baılanystyratyn ár azamat bul mindetterdi atqarýǵa jumyla kirisedi degen senimdemiz. Aldymyzda aýqymdy mindetter tur. Ultymyzdyń XXI ǵasyrdaǵy rýhanı jańǵyrý strategııasy atanǵan Elbasynyń baǵdarlamasyn oryndaýda Assambleıaǵa zor úmit artylyp otyr», dep atap ótti oblys ákimi. «Jańǵyrýdyń negizi – turaqtylyq. Birlik. Kelisim» taqyrybymen ótken jıynda Elbasynyń «Bolashaqqa baǵdar: rýhanı jańǵyrý» maqalasynda aıtylǵan mindetterdi iske asyrýǵa Assambleıanyń qatysýyn uıymdastyrý jáne Qazaqstan halqy Assambleıasynyń XXV sessııasynda Memleket basshysy júktegen tapsyrmalardy oryndaý jaıy sóz boldy. Elbasy maqalasynda baıandalǵan máselelerdi júzege asyrý maqsatynda oblysta jumys toby quryldy. Qazir barlyq aýyldar men aýdandarda tarıhty zertteý, óńirden shyqqan tanymal, tabysty adamdardyń tizimin jasaý, olardyń jetken jetistikterin nasıhattaý, ózge eldegi qandastarmen júıeli baılanys ornatý sekildi jumystar jasalyp jatyr. Sondaı-aq, oblys mektepterinde fakýltatıvtik kýrs retinde «О́lketaný» páni engiziledi. Aımaqtyń mádenı oryndary men tarıhy týraly kitapshalar shyǵarylady. Tarıhı eskertkishterdi jańǵyrtyp, qala ınfraqurylymyn damytý baǵytyndaǵy áleýmettik jobalardyń tizimin jasaý, túrli aksııalar men muqtaj jandarǵa áleýmettik kómek berý, týrıstik karta jasaý da josparda bar. Oblys ákimi Nurlan Noǵaev bul mindetti iske asyrýda, azamattardy týǵan jerine qamqorlyq tanytýǵa yntalandyrýda Assambleıanyń róli erekshe dedi. Jıynda oblystaǵy etnomádenı birlestikter músheleri men kásipkerler, jaýapty qyzmetkerler sóılep, usynys-pikirlerin aıtty. «Tavros» armıan etnomádenı birlestiginiń múshesi Greta Arýtıýnıan Elbasy maqalasynda jastarǵa úlken mindet júktelgenine, sonyń ishinde ulttyq qundylyqtardy saqtap, jandandyrýǵa basa nazar aýdarylǵanyna toqtaldy. «Qamqor» baǵdarlamasy aıasynda oblystyq Qazaqstan halqy Assambleıasy jastar qanatynyń músheleri ardagerlermen kezdestik. Bizge ásirese «Mıras» týrıstik-ólketaný klýbynyń negizin salýshylardyń biri Vıacheslav Afanasevpen tanysý áserli boldy. «Qamqor» aksııasy arqyly biz «Mıras» klýbyn qaıtadan jandandyryp, materıaldyq-tehnıkalyq bazasyn jańartýǵa, ólkemizdegi tarıhı oryndarǵa saıahat uıymdastyryp, ata-babamyzdan qalǵan baı muramen tanysýǵa jumystanǵymyz keledi», dedi ol. Al «Thonıl» koreı etnomádenı birlestiginiń múshesi, H.Dosmuhamedov atyndaǵy Atyraý memlekettik ýnıversıteti Qazaqstan halqy Assambleıasy ınstıtýtynyń jaýapty hatshysy Vera Shın: «1939 jylǵy deportasııa saldarynan Qazaqstanǵa 96 453 koreı halqy kúshtep kóshirildi. Qanshama qaıǵy-qasiret pen qýǵyn-súrgindi basynan ótkergen qazaq halqy taǵdyrlas koreı halqynyń jan jarasyn tereńinen túsinip, baýyryna basty. Mine, sonaý zulmat kezeńderge de 80 jyl boldy. Sol ýaqyttan beri koreılerden birneshe urpaq tarady, olar osynshama ystyq yqylas pen asa meıirbandylyq tanytqan qazaq jurtynyń, qazaq eli men jerine adal qyzmet etip júrgen, kez kelgen salada ózindik úlesi bar el azamattary bolyp otyr. Olardyń urpaqtary búginde Qazaqstandy óz Otany sanaıdy. Qazaq halqyna degen rızashylyǵyn bildirý maqsatynda «Thonıl» etnomádenı birlestigi Atyraý qalasynda eskertkish-monýment qoıýdy josparlap otyr», dep atap ótti. Jıynda birlik pen turaqtylyqty nyǵaıtýǵa, Qazaqstannyń áleýmettik-ekonomıkalyq jáne qoǵamdyq damýyna úles qosqan birqatar azamattar Qazaqstan halqy Assambleıasynyń jáne oblys ákiminiń alǵys hattarymen marapattaldy.
Baqytgúl BABASh, «Egemen Qazaqstan»
Atyraý