Kórmege sýretshiniń sellofan keskindemesi tehnıkasyndaǵy 30-ǵa jýyq erekshe týyndysy men «Kókjıek» jáne «Kelin» atty 2 ınstallıasııasy qoıyldy. Kórmeniń ashylý saltanatynda sóz alǵan Ulttyq mýzeı dırektorynyń orynbasary Jáken Taımaǵambetov bul kórmeniń negizgi ıdeıasy aınalany qorǵaýǵa, kútýge, aıalaýǵa baǵyttalǵanyn aıtty. Bul óner kórmesi bizge tek estetıkalyq lázzat syılap qana qoımaı, oılanýǵa májbúr etedi. Aınalamyzǵa qaraýǵa, ony kútýge, aıalaýǵa shaqyrady. Meniń oıymsha, Sáýle Súleımenovanyń bul kórmesi bizdiń elimizdi qoıyp, tipti, búkil álemdegi tyń bastama», – dep óz pikirin bildirdi. Osyǵan deıin Sáýle Súleı- menova qarapaıym qala kórinisterin salýmen jáne natıýrmortpen shuǵyldanyp kelgen bolsa, 2014 jyldan bastap plastıkalyq paketter arqyly estetıkalyq kórkemdik shyńyna umtylýda. Plastıktiń munaı ónimderiniń paıdalanylǵan qaldyǵy ekeni belgili. Kórkemóner tájirıbesi úshin ádetten tys sanalatyn jaı ǵana plastıkalyq paketti sýretshi jolaq ne tilim etip kesip alyp, bir-birine jelimdegen. Oǵan eshqandaı beıneleý ónerine qajet materıal qospaǵan, ıaǵnı munda maıly boıaý da, akrıl ne akvarel de joq. Kórme avtory sellofan keskindemesiniń tehnologııasy oılaǵannan qıyn, beınetti jumys ekenin aıtady. Plastık plastıkke jabyspaıdy, sondyqtan ony tek «dánekerleý» kerek. Bul jumys termo pıstolettiń jáne sılıkonnyń kómegimen iske aspaq. Kórmege arnaıy kelgen qonaq «AhmadyArts» táýelsiz kýratorlyǵynyń dırektory Lıza Ahmadı: «Sáýle Súleımenovanyń búgingi kórmesi meni óte qatty tańǵaldyrdy. Bizdiń kúndelikti kórip, paıdalanyp júrgen dúnıemizden osynsha ádemi týyndylardy týdyrǵany bas ımeýge múmkinshilik qaldyrmaıdy. Bul sizderdiń jas ta jańa Astanalaryńyzdaǵy jańa ónerdiń alǵashqy baspaldaqtary dep bilemin», – dedi. Sýretshiniń kórmesine jıylǵan kópshilik plastık sellofandar arqyly jasalǵan ádemi dúnıelerdi ónerdiń jańa bir kórkem tili retinde baǵalady.
Aıgúl SEIILOVA, «Egemen Qazaqstan»