Búgin kórmedegi Qytaı pavılonynda Beıjiń qalasynyń aptalyǵy saltanatty túrde ashyldy. Oǵan Beıjiń qalasy úkimetiniń ókilderi, arnaıy shaqyrylǵan qurmetti qonaqtar qatysty. Astana EKSPO-2017 kórmesindegi Beıjiń aptalyǵy budan burynǵy Búkilálemdik kórmeler, ıaǵnı Japonııadaǵy Aıtı-2005, Shanhaı EKSPO-2010 jáne Mılan EKSPO-2015 kórmelerindegi ótkizilgen Beıjiń aptalyǵynyń dástúrli jalǵasy ispettes. Sóıtip, Beıjiń qalasy EKSPO kórmesiniń alańyn ózderiniń ozyq bastamalaryn tanystyratyn tıimdi ortalyq retinde paıdalanady. Bul joly qala aptalyǵynyń taqyryp arqaýy «Bir beldeý – bir jol» ǵasyrlyq jobasynyń aýqymynda ótkizilmek. EKSPO-2017 kórmesindegi Aspan asty eli astanasynyń aptalyǵy Beıjiń qalasynyń óner sheberleriniń aıtýly konsertterimen órnektelip, kórmege kelýshi kórermenderdi Qytaı eliniń baı mádenıetimen qaýyshtyrady. Qytaı pavılonyndaǵy Beıjiń aptalyǵy kezinde bul eldegi týrızmniń damý deńgeıin aıqyndaıtyn foto kórme, halyq mýzykasynyń baıqaýy, azyq-túlik ónimderi men Beıjiń ashanasynyń til úıirer tamaqtary kórsetiletin bolady. EKSPO kórmesi aıasynda Beıjiń ashanasynyń mázirimen tanystyrý álemniń túkpir-túkpirinen osynda keletin týrısterge Qytaı ashanasyn keńinen nasıhattaý bolyp tabylady. Úsh kún boıy Qytaı pavılonynda Beıjiń qalasynyń tarıhı jáne sáýlet ónerimen tanystyratyn fılmder kórsetiletin bolady. Sonymen birge, qala aptalyǵy barysynda 2019 jyly Beıjiń qalasynda ótetin Baǵbandardyń búkilálemdik jármeńkesiniń baǵdarlamasy keńinen tanystyrylady. Baǵbandardyń búkilálemdik jármeńkesiniń taqyrybyn aıshyqtaıtyn foto sýretter Qytaı pavılonynyń ekinshi qabatynyń dálizinde keńinen kórinis tapqan. Aspan asty eli astanasynyń EKSPO-2017 kórmesindegi aptalyǵy kezinde Beıjiń mýnısıpaldyq úkimeti Reseı, Italııa jáne basqa elderdiń pavılondarymen bıznes ókilderi kóptep qatysatyn kezdesýler ótkizbek.
Jahandyq jańalyqqa yntyqqan álem týrısteriniń at basyn tireıtin ortalyǵyna aınalǵan arý Astananyń ajary araılana túsipti. Ásem Astananyń ortasyndaǵy bolashaq qalasy – EKSPO-2017 halyqaralyq mamandandyrylǵan kórmesiniń qalashyǵy Arqa tósine asyqqan tórtkúl dúnıe týrısterin kidirissiz qabyldap, qaıtalanbas qyzyqtarǵa keneltýde. Maýsymnyń 16 juldyzyndaǵy Astananyń araıly tańy daýylpaz únin dúbirletken asqaq áýenmen úndese atty. EKSPO qalashyǵyndaǵy Qytaı pavılonynyń aldynda shymqaı qyzyl ulttyq kıimderin kıgen qytaılyq bıshiler men barabanshylar kelgen qonaqtardy rııasyz kóńilmen qarsy alyp jatty.