Saltanatty shara Astana qalasynyń irgesinde ornalasqan «Qazanat» Ippodromy aýmaǵyndaǵy «Etnoaýyl» ulttyq-mádenı kesheninde uıymdastyryldy.
Baıqaý erejesi boıynsha oǵan memlekettik tildiń qyzmet etý aıasyn keńeıtý, mártebesin nyǵaıtý jáne onyń qazirgi ahýaly jóninde ózekti materıaldar jarııalaǵan tilshiler qatysty. Uıymdastyrýshylardyń aıtýynsha, elimizdiń ár óńirinen 200-den asa materıal kelip túsken. Jeńimpazdar «Úzdik maqala», «Úzdik telebaǵdarlama», «Úzdik radıobaǵdarlama», «Úzdik saıt maqalasy» nomınasııalary boıynsha tórt baǵytta marapattaldy.
Konkýrs qorytyndysy boıynsha, bas júldege «Jetisý» telearnasynyń redaktory Merýert Muratbekqyzy Ábitaeva ıe boldy. «Úzdik maqala» atalymynda «Astana aqshamy» gazetiniń jýrnalısi Gúljan Rahmanova 1-oryndy ıelense, 2-orynǵa «Egemen Qazaqstan» basylymynyń sholýshysy Ǵalym Omarhan laıyq dep tanyldy. Al úzdik úshtikti Pavlodar oblystyq «Saryarqa samaly» gazetiniń tilshisi Nurjaına Shodyr túıindedi.
«Úzdik saıt maqalasy» atalymynda 1-oryndy «Aıqyn» gazeti aqparat jáne sport bóliminiń redaktory Qanshaıym Baıdáýlet alsa, 2-oryndy «Qoǵamdyq kelisim» RMM baspasóz qyzmetiniń jetekshi sarapshysy Kamal Álpeıisova al 3-oryndy «Úrker.kz» saıtynyń jýrnalısi Nurlan Qumar ıelendi.
Sonymen qatar, «Úzdik telebaǵdarlama» atalymy boıynsha 1-oryndy «Qazaqstan-Shymkent» telearnasynyń jýrnalısi Tórebek Baıtasov, 2-oryndy «Qazaqstan-Atyraý» telearnasynyń tilshisi Sholpan Sısenalıeva, 3-oryndy «Habar» agenttigi keshki jańalyqtar qyzmetiniń tilshisi Indıra Jylqaıdarova jeńip aldy.
Al «Úzdik radıobaǵdarlama» atalymy boıynsha 1-oryndy «Halyq» radıosynyń tilshisi Raýshan Sybanjanova, 2-oryndy «Qazaq» radıosynyń tilshisi Janat Januzaqov, 3-oryndy «Halyq» radıosy tilshisi Gúlsim Qobjanova enshiledi.
Aıan ÁBDÝÁLI, «Egemen Qazaqstan»