Keńes otyrysyn partııa oblystyq fılıaly tóraǵasynyń birinshi orynbasary, «Mıras» aımaqtyq keńesiniń tóraǵasy Murathan Shúkeev sóz sóılep ashyp, júrgizip otyrdy.
Oblystyq ishki saıasat basqarmasynyń basshysy Rahııa Turmahanbetova Elbasy maqalasynda aıtylǵan rýhanı jańǵyrýdyń negizine toqtaldy. Sonymen qatar, basqarma basshysy baǵdarlamalyq maqalanyń qazaqstandyq patrıotızmdi qalyptastyrýda da aıqyn mańyzǵa ıe ekenin atap ótti. Sondaı-aq, Elbasy maqalasynda aıtylǵan «Qazaqstannyń 100 jańa tulǵasy» ıdeıasyna da Jambyl óńirinen shyqqan azamattar úles qosý kerektigin jetkizdi.
Al «Qazaqstan» Teleradıokorporasııasy» aksıonerlik qoǵamy» oblystyq fılıalynyń dırektory Meırambek Tólepbergen Elbasy maqalasynda aıtylǵan «Týǵan jer» baǵdarlamasy jáne «Kıeli jer» jobasy boıynsha óz oıyn ortaǵa saldy. Negizi rýhanı jańǵyrý dep maqalanyń aty aıtyp turǵandaı, búgingi tańda rýhanı jańǵyrý basty mindet bolyp otyr. Sondyqtan da ulttyq rýh, ulttyq sanany kitap oqý arqyly qalyptastyrýǵa bolady. Osy turǵyda oıyn sabaqtaǵan ol budan ózge de máselelerdi alǵa tartty. Sonymen qatar, Meırambek Myltyqbaıuly oblysta turatyn aqyn-jazýshylardyń kitaptaryn shyǵarý jáne olardy nasıhattaý kerektigine de toqtaldy. Sondaı-aq, kitap jármeńkesin uıymdastyryp, jastarǵa kóbirek qoldaý kórsetý kerek degen oıyn da aıtty.
Ulttyń arǵy-bergi tarıhyndaǵy erekshelikteri jóninde áńgimelegen jazýshy-dramatýrg Elen Álimjan dúnıejúziniń rýhanı tájirıbesinen mysal keltire otyryp, oıyn jetkizdi. Búgingi tańda Elbasy maqalasynda aıtylǵan dúnıelerdi ıgerip alýdyń ózi ultty, memleketti edáýir damytatynyn aıtty. Jalpy, Elbasy maqalasy san-salaly. Alaıda, baǵdarlamalyq maqalada aıtylǵan negizgi oı, ıdeıa – qazaq halqynyń rýhanı jańǵyrýy. Bul turǵyda latyn álipbıine kóshýdiń de mańyzdylyǵy orasan. Fılologııa ǵylymdarynyń doktory, professor Sámen Qulbaraq latyn álipbıine kóshý týraly pikirin Elbasy maqalasynda aıtylǵan negizgi oılarmen dáleldedi.
Budan keıin aımaqtyq keńes músheleriniń pikirleri tyńdalyp, usynystary qabyldandy. Jıyn sońynda Murathan Júnisáliuly aıtylǵan usynystardyń qabyldanatynyn, keńes músheleriniń taǵy da qandaı ıdeıalary bolsa da tyńdaýǵa ázir ekenin jetkizdi.
Hamıt Esaman, «Egemen Qazaqstan»