Demalys orny óz jumysyn 12 maýsymnan bastady. Jospar boıynsha, árqaısysynda 200 bala demalatyn tórt aýysymda jaz boıy 800 jetkinshek qamtylmaq. Ár aýysymnyń uzaqtyǵy – 15 kún. Lagerge az qamtylǵan, kóp balaly, asyraýshysynan aıyrylǵan otbasylardyń balalary jáne úzdik oqýshylar tartylýda.
– Toǵyz aı ýaqytyn mektepte ótkizgen oqýshylar úshin jazǵy demalys mezgili bıyl erekshe bolmaq, – deıdi demalys ornynyń ashylý saltanatynda sóz alǵan aýdan ákimi S.Ábeýova. – Demalys ýaqytynyń tıimdi ótýi, eń aldymen, onyń jumysynyń júıeliligine baılanysty. Balalardyń jazǵy demalys ýaqytynda jaqsy saýyǵyp qaıtýyna lagerde barlyq jaǵdaı jasalǵan. «Fakel» jazǵy lagerinde balalar demalyp qana qoımaı, kún saıyn saıahattar jasap, trenıngter men oıyndar, ártúrli keshter men saıystar ótkizedi.
Bıyl lagerde Aqtoǵaı aýdanyna qarasty 17 eldi mekenniń 7-15 jas aralyǵyndaǵy balalary tynyǵady. Osy ıgi bastamany qolǵa alǵan oblystyq máslıhat depýtaty Aıman Bekbolatqyzyna jáne Shashýbaı kenti «Mektep-balabaqsha kesheni» ujymyna, aýdandyq bilim bólimine kópshiliktiń rızashylyǵy zor.
– Birneshe jyl buryn Balqash ken-metallýrgııa kombınatynyń óndiristik jumys baǵyty halyqaralyq standartqa kóshken edi. Standartqa saı kásiporyn tek qana óndiris baǵytynda jumys jasaı bastady. Sondyqtan buryn «Qazaqmys» korporasııasy aınalysyp kelgen áleýmettik qoldaý baǵytyndaǵy jumystar men nysandardyń barlyǵy memleketke, ıaǵnı jergilikti basqarý organdarynyń quzyryna ótken bolatyn, – deıdi oblystyq máslıhattyń depýtaty Aıman Bekbolatqyzy. – Olardyń qatarynda osy «Fakel» saýyqtyrý lageri de bar. Tórt jyl buryn oblystyq máslıhattyń komıssııa otyrysynda atalǵan ǵımarattardy saqtap qalý máselesin kóterip, depýtattyq jumysymnyń barysynda baqylaýǵa alǵan bolatynmyn. Qolymyzǵa tıgen lagerdi qaıta qalpyna keltirýde qıyndyqtar boldy. Qajetti qarjy kózin oblys ákiminen suradyq. Eńbegimiz esh ketken joq.
Mıras ASAN, «Egemen Qazaqstan»
Qaraǵandy oblysy, Aqtoǵaı aýdany