Jekpe-jek 12 raýndqa jalǵasty. Kezdesýge Pakıaonyń ıeligindegi WBO tujyrymy boıynsha ekinshi jartylaı orta salmaqtaǵy álem chempıony tıtýly tigildi. Sport portalynyń málimetinshe, birinshi raýndta Horn basym bolǵan, sebebi serııaly soqqylar jasap, Pakıaony qorǵanýǵa májbúrlegen.
Kelesi raýndtarda fılıppın aýstralııalyq boksshynyń mánerine úırenip, naqty soqqylarymen jaýap qaıtara bastady. Eki boksshy da qatar soqqy jasaǵan, desek te, Hornnyń qımyly shıraq kórindi, Pakıao da qarsylasyna soqqy daryta bildi. Boks barysynda eki boksshynyń da qabaǵy jarylyp ketti.
Altynshy raýndta Horn oń qolymen soqqy jasap, Mennıdi eseńgiretti, alaıda Pakıao qulamady. Jekpe-jek ortasynda fılıppın aıqyn basymdyǵyn kórsete almady, sebebi rıng qojaıyny sátti qarsy shabýyldar jasap, keıinirek tipti tek shabýylǵa kóshti. Oǵan denesiniń iriligi de kómek boldy. Jetinshi raýndta qos boksshynyń bastary túıisip, Pakıao taǵy da qabaǵyn jaryp aldy, sóıtip, ol qarsylasyna bul raýndty berýge májbúr boldy.
Toǵyzynshy raýndta fılıppın alǵa júrip, sol qolymen birneshe ret Hornǵa soqqy jasaı bildi. Mennı tipti kezdesýdi nokaýtpen aıaqtaýǵa az qalǵan, biraq Djeff qulamady. Qorytyndy raýndtarda boksshylar kezek-kezek basymdyq alyp otyrdy, biraq tóreshiler jeńisti aýstralııalyqqa berdi (115-113, 115-113,117-111).
Osylaısha, Mennı Pakıao chempıtondyq tıtýlyn qorǵap qala almaı, karerasynda jetinshi jeńilisine ushyrady. О́z kezeginde Djeff Horn 16-shy jeńisin toılady.