Almaty qalasy Jumyspen qamtý jáne áleýmettik baǵdarlamalar basqarmasynyń basshysy Aıgúl Ahmetova 2016 jyly áleýmettik qoldaýǵa múmkindigi shekteýli 13 myń adam qamtylyp, olarǵa 2,1 mlrd. teńgeniń kómegi kórsetilse, bıylǵy jyly 22 myńnan astam azamatqa áleýmettik qoldaý kórsetý úshin 4,1 mlrd. teńgeniń bólingenin aıtty.
«О́tken jyly artyǵymen bólingen qarjynyń arqasynda qosymsha joǵary sapaly tehnıkalyq buıymdar satyp alynyp, múgedekterge kórsetilgen áleýmettik kómektiń aıasy ulǵaıdy. 2017 jyly 836 múmkindigi shekteýli jan úshin Germanııa men Polshadan quny 200 mıllıon teńgeden asatyn 958 oryndyq-arba satyp alyndy. Quny 593 mln. teńgeni quraıtyn zamanaýı sýrdo-tıflotehnıkalyq buıym aldyrylyp, 2 myńnan astam adamǵa taratyldy, sondaı-aq, baǵdarlamalarmen jáne daýys sıntezimen jabdyqtalǵan noýtbýkter, oqý mashınalary alyndy. 2012 jyldan beri kezekte turǵan múgedekterdiń barlyǵy qajetti jabdyqtarmen tolyq qamtylady», – dedi Aıgúl Ahmetova.
Inklıýzıvti bilim berýge aıryqsha nazar aýdaryla bastaǵandyqtan, Almatyda erekshe kútimdi qajet etetin 36 bala bes mektepte bilim alsa, 17 baldyrǵan úsh balabaqshada tárbılenip, 276 stýdent úsh oqý ornynda dáris alyp jatqanyn habarlady basqarma basshysy. 36 mektepte myńnan astam balany qamtyǵan korreksııalyq damý synyptary, psıhologııalyq-pedagogıkalyq korreksııanyń 7 kabıneti jumys istese, olardaǵy 877 balaǵa kómek kórsetilip, 4 psıhologııalyq-medısınalyq keńesterde 5588 baldyrǵan tekserýden ótken.
Bıylǵy jyldyń mamyr aıynda erekshe bilim berýdi qajet etetin balalar úshin Inklıýzıvti kásibı bilimniń resýrsty ortalyǵy ashylǵan, onda jyl aıaǵyna deıin 500 múgedekke bilim berilmek.
Múgedekterdiń sporttyq shynyǵýyna da jete nazar aýdarylyp, múmkindigi shekteýli jandar úshin jumys isteı bastaǵan «Almatynyń sport klýbynda» endi qozǵalysy shekteýli, kózi nashar kórip, qulaǵy estimeıtinder júzýmen, jeńil atletıkamen, fýtbolmen, erkin kúrespen, voleıbolmen, arba tennısimen, basqa da sport túrlerimen aınalysatyn bolady.
Qala basshysynyń tikeleı tapsyrmasy boıynsha qazirgi kezde múgedekterdi áleýmettik nysandar men kóliktik qurylymdarǵa, saıabaqtar men skverlerge, mádenı oryndarǵa beıimdeý jumystary júrgizile bastaǵanyn atap ótken basqarma basshysy ár aýdanda ınklıýzıvti balalar alańdaryn jasaý qarastyrylǵanyn, al Abaı atyndaǵy MATOB osyndaı orynnyń jobasy jasalyp, tıisti jumys bastalyp ketkenin aıtty.
Al shahar basshysy bul jumysqa qalanyń barlyq áleýmettik ınstıtýttary men úkimettik emes uıymdaryn keńinen tartý qajettiligine aıryqsha toqtaldy. «Tek ýáde berýmen ǵana shektelmeı, máseleni birden qolǵa alyp, birden sheshý qajet», – degen qala ákimi Baýyrjan Baıbek bólingen qarjylardyń barlyǵynyń ashyqtyǵy men tıimdiligin qamtamasyz etýdi tapsyrdy.
Jıyn barysynda «K. Imanalıev» atyndaǵy múmkindigi shekteýli jandardyń quqyǵy jónindegi komıssııa tóraǵasy Venıamın Alaev Úılestirý keńesi músheleriniń ashyq daýys berý jolymen eki jyldyq merzimge qala ákiminiń shtattan tys keńesshisi bolyp saılandy.
Mıra Baıbek,
«Egemen Qazaqstan»
Almaty