Osy kezde qurylysy aıaqtalyp kele jatqan kópqabatty turǵyn úıdiń altynshy, jetinshi jáne segizinshi qabattarynyń balkondary opyrylyp, iske alǵysyz bolyp qaldy. Buǵan qosa salmaqty krandardyń qulaýy áserinen birinshi qabattaǵy páterlerdiń terezeleri kúl-parshasy shyqty. Ári sol mańdaǵy avtokólik turaǵyndaǵy alty jeńil avtomashına búlindi.
Qatty daýyl Ábilqaıyr han dańǵylynyń boıyndaǵy Qobylandy batyr atyndaǵy ortalyq stadıon trıbýnasy tóbesiniń bir jaq bóligin ushyryp túsirdi. Osy kezde stadıonnyń irgesindegi «Rahat» meıramhanasy terezeleriniń áınekteri kúl-parshasy shyqty. Áıteýir, oqys oqıǵadan eki jaǵdaıda da adam shyǵyn bolmaǵan. Jaraqat alǵandar jóninde de málimet joq. Sondaı-aq, qatty jeldiń áserinen qalanyń keıbir aýmaǵyndaǵy tal-terekterdiń sabaqtary synyp qulaǵany, keıbir tusta burshaq jaýyp ótkeni belgili bolyp otyr. Qazir tabıǵattyń kesirinen búlingen nysandardy qalpyna keltirý jumystary atqarylýda. Oǵan tótenshe jaǵdaılar departamenti men qurylys kompanııalarynyń tehnıkalary jumyldyrylǵan. Qatty daýyldyń qandaı kólemde materıaldyq shyǵyn ákelgeni ázirge belgisiz. Qazir bul ispen óńirdegi arnaıy mamandar toby aınalysýda.
Temir Qusaıyn,
"Egemen Qazaqstan"
Aqtóbe oblysy