Nursultan Nazarbaev árbir qazaqstandyq úshin memlekettik tý erekshe mańyzǵa ıe ekenin aıtyp, elimizdiń táýelsizdik jyldarynda abyroıly damý jolynan ótkenine toqtaldy.
– Biz elorda kúni qarsańynda memlekettik týymyzdy kóterý rásimin dástúrli túrde ótkizip kelemiz. 25 jyl ishinde biz Qazaqstandy bir týdyń astyna birikken birtutas ult retinde qalyptastyra aldyq, – dedi Memleket basshysy.
Elbasy Qazaqstannyń jahandyq tehnologııalyq damýdyń aldyńǵy shebinen tabylýǵa umtylatynyn aıtyp, elimizdiń ekonomıka jáne sport salalaryndaǵy jetistikterine erekshe toqtaldy.
– Qazaqstannyń kók baıraǵy álemniń kóptegen iri arenalarynda ulttyq jeńisimizdiń saltanatynda jelbireıdi. Biz elimizge degen shynaıy qýanysh pen maqtanysh sezimine toly sátterge Almatyda ótken Qysqy ýnıversıada oıyndarynyń barysynda kýá boldyq. Aspan tústes kók týymyzdyń astynda Qazaqstan búkil álemge tanyldy, – dedi Qazaqstan Prezıdenti.
Elbasy Qazaqstannyń jahandyq úderisterge belsendi atsalysyp otyrǵanyna nazar aýdaryp, elimiz halyqaralyq arenada bitimgershilik qyzmetti jalǵastyra beretinin aıtty.
– Biz qaqtyǵysyp jatqan taraptardy kelisimge kelip, tatýlasýǵa shaqyratyn memleketke aınaldyq. Sol arqyly bedelimiz de artyp keledi. Biz jer betinde beıbitshilik ornatý úshin kúresip, ıadrolyq qarýdyń joıylýyna atsalysýdamyz. Biz senimge ıe bolyp, birtutas ári tolerantty qoǵamda ómir súrýdemiz. Sondyqtan munda álemdik dástúrli dinderdiń sezi ótip otyrady, – dedi Memleket basshysy.
Nursultan Nazarbaev birlik elimizdiń odan ári damýynyń jáne aldymyzǵa qoıǵan barlyq mindetter men baǵdarlamalardy iske asyrýdyń negizi ekenin atap ótti.
Sonymen qatar, Elbasy Astananyń táýelsiz Qazaqstan tarıhyndaǵy róli men mániniń joǵary ekenin aıtty.
– Astana – múmkindikterimizdiń, halqymyzdyń ulylyǵy men aýyzbirshiliginiń nyshany. Elordamyz – Ortalyq Azııa men Azııa qurlyǵynyń marjany. Biz bas qalamyzdy súıemiz, al qonaqtarymyz oǵan tańyrqaı qaraıdy, – dedi Qazaqstan Prezıdenti.
Saltanatty rásim barysynda Memleket basshysy – Qazaqstan Respýblıkasy Qarýly Kúshteriniń Joǵarǵy Bas qolbasshysy elimizdiń joǵary áskerı oqý oryndary – Qorǵanys mınıstrligi Qurlyq áskerleri Áskerı ınstıtýtynyń, Qorǵanys mınıstrligi Radıoelektronıka jáne baılanys áskerı-ınjenerlik ınstıtýtynyń, Ulttyq qaýipsizdik komıteti Shekara akademııasynyń, Ishki ister mınıstrligi akademııasynyń, Ishki ister mınıstrligi Ulttyq ulan Áskerı ınstıtýtynyń, Ishki ister mınıstrligi Kókshetaý tehnıkalyq ınstıtýtynyń úzdik túlekterine ofıserlik shender tapsyrdy.
Qazaqstan Prezıdenti joǵary áskerı oqý oryndarynyń barlyq túlekterine otanymyzǵa qyzmet etý jáne qazirgi álemdegi úderister jaǵdaıynda ultymyzdyń múddesin qorǵaý paryzy jóninde aıtty.
– Sizderden ofıserlik mindetti múltiksiz oryndaý talap etiledi, qaıda jerde bolmasańyzdar da, týymyzdy qorǵap, ony bıikte ustaýǵa tıissizder. Sizderge kúrdeli ári jaýapty mıssııa júkteledi, ol – azamattardyń beıbit ómir súrýin qamtamasyz etý jáne elimizdiń ulttyq múddesin qorǵaý, – dedi Elbasy.
Sońynda Nursultan Nazarbaev tý kóterý rásiminen keıin elorda kúni qurmetine arnalǵan merekelik is-sharalardyń bastalatynyn aıtyp, barsha jurtty kele jatqan meırammen quttyqtady.