Ata-anasymen habarlasqanymyzda osy súıinshili habardy jańa estip, qýanyshtan esteri shyǵyp otyrǵan sáti eken.
- Alǵashynda sene almadyq, – deıdi. – Taldyqorǵan qalalyq ákimdiginiń ókilderi habarlasyp quttyqtaǵanda túsinbeı qaldyq.
Adamda bir kóńil-kúı bolady. Týǵan kúnde, erekshe merekede, osyndaı qýanyshtarda. Qońyraý shalsań, tolqyp turǵanyn ańǵarý asa qıyndyq týǵyzbaıdy. Quttyqtamaı jatyp-aq rahmet aıtyp qoıatyn jaıttar jıi ushyraıdy. Dıana dál sol kóńil-kúıde jol ústinde kele jatyr eken. Aqsý aýdany, Sýyqsaı aýylynan – Taldyqorǵanǵa. Kólikte alty adam bar eken. Dıanadan bólek Mýslımanyń ájesi, ákesi Samat, qaıyn ápkesi, birinshi ul Sultan bar. Alaburtyp, alyp-ushyp kele jatqandary ańǵarylady. Tutqanyń ar jaǵynan telefon qońyraýlary, basqa da quttyqtaý qabyldanyp jatqandaryn estiledi.
Tanys bolyńyzdar! 18 mıllıonynshy turǵynnyń aty-jóni Mýslıma Samatqyzy. Keıin Mýslıma jaıly málimet izdegende «Pedagogtar otbasynda ómirge kelgen» degen derekke jolyǵaryńyz sózsiz. 3 keli, 300 gramm bolyp týǵan. Otbasyndaǵy ekinshi perzent esepteledi. Esepteledi deıtinimiz, qazaq salty boıynsha tuńǵysh bala – ata-ájege tabıǵı. Endi mine, ózderiniń jeke menshik qyzdaryn ómirge ákelgen jas otbasy – kútpegen qýanyshqa kenelip otyr. Qýanysh ıeleri Samat Bestibaev – 1982 jyly týǵan; Dıana Omarhanova – 1991 jylǵy jastar. Mýslımanyń aǵasynyń esimi – Sultan.
– Mýslıma 18 mıllıonynshy qazaq ekenin bilmeı turǵanda da sizderdiń qatty qýanǵandaryńyz sózsiz. Perzent úshin nege de bolsa daıyn ekenderińizdi de bilemiz. Degenmen, aıtyńyzshy, qyzyńyz úshin, ózińiz úshin ne qalar edińiz? – dep suradyq.
- Páter...
- Páter jaldap turýshy ma edińizder?
- Iá. Ul-qyzdarymyz óz úıinen balabaqshaǵa, mektepke baryp júrip er jetse dep jıi armandaımyz.
- Mýslımanyń atyn kim qoıdy?
- Ákesi ózi qoıdy.
- Nege Mýslıma?
- Joldasym sońǵy kezderi din jolyna moıynsunyp, namazǵa jyǵylsam ba dep nıettenip júr. Namazdy da soqyr senimmen emes, úlken bilimmen, tanymmen oqyǵan durys qoı dep oılaımyn. Sondyqtan, osy maǵynasy – «Qudaıdyń súıikti quly», «Musylman qyzy» degen maǵynany beretin atty tańdady.
- 18 mıllıonynshy Qazaqstan azamatyn ómirge ákelgen ana retinde sizge ne aıtsańyz da jarasady..
- Allaǵa táýbe aıtamyz aldymen. Bul rasynda Allanyń bergen úlken syıy biz úshin. Elge, aǵaıyn-týysqa rahmet. Quttyqtap, qýanyshymyzǵa ortaqtasyp jatyr... Ákimshilik aýylǵa arnaıy kólik jiberdi. Bul bizge ǵana emes, Mýslımaǵa ǵana emes, keleshek urpaqqa kórsetken qurmet dep bilemiz. Aýyzǵa rahmetten, táýbeden basqa sóz túspeıdi eken... Qazaqtyń sany kóbeıe bersin! Ul-qyzdarymyz baqytty elde-ósip ónse eken. Sony tileımin Alladan!
Aıtpaqshy, 18 mıllıonynshy qazaqtyń ómirge kelýi de ońaı bolmaǵan. Dıananyń aıtýynsha, birinshi uldy ómirge ákelgende qınalmapty. Tabıǵı jolmen bosanǵan. Al, ekinshi Mýslıma qyz ota arqyly ómirge kelgen. Ádette, birinshi sábı tabıǵı jolmen týǵan jaǵdaıda, odan keıingi sábılerdi bosanýda anasy kóp qınalmaıdy deıtin. «Bálkim, Mýslıma qyz óziniń tańdaýly ekenin bilip, azdap erkelegen shyǵar», deıdi anasy.
Til-kózden saqtasyn dedik biz! Qurmetteıik. Súıinshi suraıyq! Bul – bizdiń qazaqtyń ósip-ónýine nemquraıly qaramaıtynymyzdy dáleldeıdi. Qala berdi, jastardy ana bolýǵa, áke bolýǵa talpyndyrady.
Jol ústi bolǵasyn kóp sóılesýdiń sáti túspedi. Kóp suraǵymyzdy qoıyp úlgermedik. Aqyry, baılanys úzildi. Qushaǵyńdy ash, qazaq, ortańa 18 mıllıonynshy qazaq – Mýslıma kele jatyr!..
Almas Núsip,
«Egemen Qazaqstan»
Almaty oblysy