Bıyl óńirde dıqanshylar gektaryna 22-23 sentnerden ónim alyp otyr. Máselen óńirdegi alǵashqy egin oraǵy bastalǵan óńir T.Rysqulov aýdanyndaǵy «Lýgovoı jylqy zaýyty» jaýapkershiligi shekteýli seriktestigi bıyl 11 myń gektar alqapqa astyq sepken. Onyń 4380 gektary kúzdik bıdaı jáne 7000 gektary jazdyq arpa.
Búginde egin jınaý naýqanyna 60-qa jýyq aýylsharýashylyq tehnıkalary jumyldyrylǵan. Onyń ishinde 13 «Djon-dır» kombaındary dán bastyrýda. Atalǵan «Djon-dır» kombaındarynyń árqaısysy kúnine 70 gektardyń astyǵyn oryp, bir táýlikte 800 gektar astyqty jınaı alady. Sonymen qatar óńirdegi Shý, Qordaı jáne Baızaq aýdandarynda da egin orý naýqany bastalyp ketti. Endi bıylǵy egin de erekshe ónim berýge tıis. Máselen jyl saıyn tehnıkalyq baza josparly túrde jańartylyp otyrady. Aıtalyq, byltyrǵy jyly 2,1 mıllıard teńgege 266 birlik jańa aýyl sharýashylyǵy tehnıkalary satyp alynǵan. Onyń ishinde 160 birlik traktor, 19 kombaın, qalǵan 87 birlik ár túrli tehnıkalar bar. Al, bıyl jyl basynan beri 815 mıllıon teńgege 93 traktor, 9 kombaın jáne 38 ártúrli tehnıkalar alyndy. Ústimizdegi jyly aýyl sharýashylyǵy tehnıkalarynyń jańarý kórsetkishi ótken jylmen salystyrǵanda artady dep josparlanýda.
Aǵymdaǵy jyly oblys boıynsha 106,7 myń gektar alqapqa kúzdik bıdaı, 139 myń gektarǵa jazdyq arpa, 15 myń gektarǵa dándik júgeri, 2,2 myń gektarǵa jazdyq bıdaı, 9 myń gektarǵa qant qyzylshasy, 87,7 myń gektardan astam maıly daqyldar, 36,8 myń gektarǵa kókónis jáne baqsha daqyldary sebilgen. Sondaı-aq, ótken jyly egis alqaptarynan jınalǵan ónimniń ortasha kórsetkishi 24 sentnerdi quraǵan bolatyn. Al endi Shý, Qordaı, Baızaq aýdandaryndaǵy egin jınaý naýqanynyń kórsetkishi de tómen bolmaýǵa tıis.
Hamıt Esaman,
«Egemen Qazaqstan»
Jambyl oblysy